మస్కట్: టెక్ కంపెనీలకు మద్దతు ఇచ్చే "సాస్" కార్యక్రమంలో భాగంగా "సాస్ ఫర్ ఎక్సలెన్స్" కార్యక్రమాన్ని ఒమన్ రవాణా, కమ్యూనికేషన్స్ మరియు ఇన్ఫర్మేషన్ టెక్నాలజీ మంత్రిత్వ శాఖ  ప్రారంభించింది. ఒమానీ టెక్ కంపెనీలు వృద్ధి చెందగల మరియు ప్రపంచవ్యాప్తంగా విస్తరించగల సామర్థ్యం ఉన్న స్థానిక పరిష్కారాలను అభివృద్ధి చేయడానికి వీలు కల్పించే లక్ష్యంతో, ఆర్థిక మంత్రిత్వ శాఖ, కార్మిక మంత్రిత్వ శాఖ, ఒమాన్ ఇన్వెస్ట్‌మెంట్ అథారిటీ, ప్రాజెక్ట్స్, టెండర్స్ మరియు లోకల్ కంటెంట్ అథారిటీ, పెట్రోలియం డెవలప్‌మెంట్ ఒమాన్ (పిడిఓ),  డెవలప్‌మెంట్ బ్యాంక్‌ల భాగస్వామ్యంతో ఈ కార్యక్రమాన్ని ప్రారంభించినట్టు వెల్లడించింది.  
ఈ కార్యక్రమం, జాతీయ టెక్ కంపెనీలకు అదనపు విలువతో కూడిన డిజిటల్ ఉత్పత్తులు మరియు సేవలను అభివృద్ధి చేయడానికి దోహదం చేయనుంది. స్థానిక డిజిటల్ స్వయం సమృద్ధిని పెంపొందించడంపై ఇది దృష్టి పెడుతుంది. ఇది డిజిటల్ సార్వభౌమత్వాన్ని పటిష్టం చేయడానికి, స్థానిక కంటెంట్‌ను మెరుగుపరచడానికి,  ప్రాంతీయ, ప్రపంచ మార్కెట్లలో పోటీపడగల ఒమానీ కంపెనీల పునాదిని నిర్మించడానికి సాయపడుతుందని రవాణా, సమాచార మరియు కమ్యూనికేషన్స్ మంత్రిత్వ శాఖ అండర్ సెక్రటరీ డాక్టర్ అలీ అమెర్ అల్ షిధానీ తెలిపారు. ఈ కార్యక్రమం జాతీయ ప్రతిభపై ఆధారపడి వారి పోటీ సామర్థ్యాలను పెంపొందిస్తుందన్నారు. సాంకేతిక పరిజ్ఞానాల స్థానికీకరణకు మరియు జాతీయ డిజిటల్ పరిశ్రమను మెరుగుపరచడానికి దోహదపడుతుందని పేర్కొన్నారు. ఇది స్టార్టప్‌లు, జాతీయ టెక్ కంపెనీలు ప్రాంతీయంగా మరియు ప్రపంచవ్యాప్తంగా పోటీపడటానికి, విస్తరించడానికి అవసరమైన సామర్థ్యాన్ని పెంపొందించుకోవడానికి మద్దతు ఇస్తుందని వివరించారు.
ప్రభుత్వ సంస్థలు, ఆర్థిక మరియు పెట్టుబడి సంస్థలు, ప్రైవేట్ రంగం మధ్య భాగస్వామ్యానికి ఈ కార్యక్రమం ఒక అధునాతన నమూనాని ప్రతిబింబిస్తుందని తెలిపింది. జాతీయ ఆర్థిక వ్యవస్థకు అదనపు విలువను చేకూరుస్తుందన్నారు. "సాస్ ఫర్ ఎక్సలెన్స్" కార్యక్రమం నిర్దిష్ట ప్రమాణాలు మరియు నియంత్రణల ప్రకారం ఒమానీ టెక్ కంపెనీలను ఎంపిక చేయడంపై దృష్టి సారిస్తుందని, ఆ తర్వాత వాటి వృద్ధిని వేగవంతం చేయడానికి మరియు ప్రాంతీయ మార్కెట్లలోకి విస్తరించడానికి వాటి పోటీ సామర్థ్యాలను మెరుగుపరచడానికి ప్రయోజనాలు మరియు ప్రోత్సాహకాలను మంజూరు చేస్తుందని అల్ షిధానీ వివరించారు. సాస్ ఫర్ ఎక్సలెన్స్‌లో ఒమానీ టెక్ కంపెనీలు తమ టెక్ ఉత్పత్తులు మరియు సేవలను అభివృద్ధి చేసుకోవడానికి, కొత్త విదేశీ మార్కెట్లను తెరవడానికి సహాయపడే సాధనాలు మరియు సహాయక కార్యక్రమాల ప్యాకేజీ ఉంటుందని, తద్వారా ప్రపంచవ్యాప్తంగా ఒమానీ కంపెనీలు పోటీ పడేలా వాటిని  మెరుగుపరుస్తుందని వెల్లడించారు.