కువైట్ : కువైట్‌లోని జబ్రియా ప్రాంతంలో ఆదివారం రాత్రి భారీ ప్రమాదం చోటుచేసుకుంది. మూడు అంతస్తుల నివాస భవనం పైకప్పు ఒక్కసారిగా కూలిపోయింది. అందులో నివసించే నలుగురు లోపల చిక్కుకుపోయారు. సమాచారం అందుకున్న అగ్నిమాపక సిబ్బంది, అత్యవసర సహాయక బృందాలు వేగంగా స్పందించి వారిని సురక్షితంగా బయటకు తీసుకువచ్చాయి.

జబ్రియాలోని ఓ నివాస భవనం పైకప్పు కూలిపోయి పలువురు చిక్కుకుపోయారని అంతర్గత వ్యవహారాల మంత్రిత్వ శాఖ ఆపరేషన్స్ రూమ్‌కు సమాచారం అందిందని, వెంటనే హవల్లీ, సల్మియా అగ్నిమాపక కేంద్రాల నుంచి బృందాలను సంఘటనా స్థలానికి తరలించినట్లు జనరల్ ఫైర్ ఫోర్స్ ఒక ప్రకటనలో తెలిపింది. ప్రమాదం మరింత పెరగకుండా ముందుజాగ్రత్త చర్యగా భవనాన్ని పూర్తిగా ఖాళీ చేయించినట్లు పేర్కొంది.

అయితే, రక్షించబడిన వారి ఆరోగ్య పరిస్థితిపై అధికారులు ఎలాంటి వివరాలు వెల్లడించలేదు. అలాగే పైకప్పు కూలిపోవడానికి గల కారణం కూడా ఇంకా తెలియరాలేదు. నిర్మాణ లోపమా? లేక మరేదైనా కారణమా? అన్న కోణంలో అధికారులు దర్యాప్తు ప్రారంభించారు. దర్యాప్తు అనంతరం ప్రమాదానికి గల అసలు కారణాలు వెల్లడయ్యే అవకాశం ఉంది.