మస్కట్: ఒమాన్‌లోని దక్షిణ అల్ షర్కియా గవర్నరేట్ పరిధిలోని మసీర్హా పోర్టు వద్ద సోమవారం జరిగిన అగ్నిప్రమాదాన్ని రాయల్ ఎయిర్ ఫోర్స్ ఆఫ్ ఒమాన్ (RAFO) అగ్నిమాపక సిబ్బంది సకాలంలో అదుపులోకి తీసుకువచ్చారు. అధికారుల వివరాల ప్రకారం, మసీర్హా పోర్టులోని  పాత చేపల వేట పడవల శిథిలాల్లో మంటలు చెలరేగాయి. సమాచారం అందుకున్న వెంటనే మసీర్హా ఎయిర్ బేస్ ‌కు చెందిన అగ్నిమాపక బృందాలు ఘటనాస్థలికి చేరుకుని వేగంగా సహాయక చర్యలు చేపట్టాయి.

ఫైర్ ఫైటర్స్ సకాలంలో స్పందించి  మంటలను పూర్తిగా అదుపులోకి తీసుకువచ్చారని RAFO తెలిపింది. ఈ దుర్ఘటనలో ఎలాంటి ప్రాణనష్టం లేదా ఎవరూ గాయపడలేదని వెల్లడించింది. ప్రభుత్వ సంస్థలతో సమన్వయంగా పనిచేస్తూ పౌరులు, ప్రవాసులు, ప్రజా ఆస్తుల భద్రతను కాపాడేందుకు ఒమాన్ సాయుధ దళాలు ఎల్లప్పుడూ సిద్ధంగా ఉంటాయని పేర్కొన్నది.