అబుదాబి: నకిలీ, కల్తీ, గడువు ముగిసిన ఉత్పత్తుల కొనుగోలు ప్రజల ఆరోగ్యంతో పాటు భద్రతకు కూడా తీవ్రమైన ముప్పుగా మారుతుందని యూఏఈ అధికారులు హెచ్చరించారు. కేవలం విశ్వసనీయ దుకాణాలు, ధృవీకరించిన ఆన్‌లైన్ ప్లాట్‌ఫారమ్‌లలో మాత్రమే కొనుగోళ్లు చేయాలని సూచించారు. ఉత్పత్తిని కొనుగోలు చేసే ముందు ప్యాకేజింగ్, ఉత్పత్తి వివరాలు, తయారీ దేశం, గడువు తేదీని తప్పనిసరిగా పరిశీలించాలన్నారు. కొనుగోలు అనంతరం బిల్లు, రసీదు, వారంటీ కార్డులను భద్రంగా ఉంచుకోవాలని సూచించారు. ముఖ్యంగా సోషల్ మీడియా, అనధికారిక ఆన్‌లైన్ విక్రేతల నుంచి వస్తువులు కొనుగోలు చేయవద్దని హెచ్చరించారు.

నకిలీ వస్తువుల వ్యాపారం నేరం
2023 నాటి ఫెడరల్ డిక్రీ-లా నం. 42 (వాణిజ్య మోసాల నిరోధక చట్టం) ప్రకారం నకిలీ, కల్తీ లేదా పాడైన ఉత్పత్తులను దిగుమతి చేయడం, తయారు చేయడం, నిల్వ చేయడం, రవాణా చేయడం, విక్రయించడం, ప్రచారం చేయడం లేదా వ్యాపారం చేయడం నేరంగా పరిగణిస్తారు. ఈ కార్యకలాపాలకు ప్రయత్నించడం కూడా చట్ట ఉల్లంఘనగానే భావిస్తారు. అలాగే వినియోగదారులను ఉత్పత్తి నాణ్యత, పరిమాణం, తయారీ దేశం లేదా గడువు విషయంలో తప్పుదోవ పట్టించడం, తప్పుడు ప్రకటనలతో ఉత్పత్తులను విక్రయించడం కూడా వాణిజ్య మోసంగా పరిగణించబడుతుంది. ఆహార పదార్థాలు, మందులు, సౌందర్య సాధనాలు వంటి నియంత్రిత ఉత్పత్తుల్లో నకిలీ లేదా కల్తీ వస్తువుల విక్రయం ప్రజారోగ్యానికి తీవ్రమైన ముప్పుగా మారుతుందని అధికారులు పేర్కొన్నారు.

రూ.2.3 కోట్ల వరకు జరిమానా.. రెండేళ్ల జైలు
చట్టాన్ని ఉల్లంఘించిన వారికి కఠిన శిక్షలు విధిస్తారు. నకిలీ, కల్తీ లేదా పాడైన వస్తువుల దిగుమతి, తయారీ, నిల్వ, రవాణా, ప్రచారం లేదా విక్రయంలో ఉద్దేశపూర్వకంగా పాల్గొన్న వారికి గరిష్టంగా రెండేళ్ల జైలు శిక్ష, 5,000 దిర్హామ్‌ల నుంచి 1 మిలియన్ దిర్హామ్‌ల వరకు జరిమానా లేదా రెండూ విధించవచ్చు. ఈ కఠిన నిబంధనల ద్వారా వినియోగదారుల హక్కులను కాపాడడంతో పాటు మార్కెట్‌పై ప్రజల విశ్వాసాన్ని బలోపేతం చేయాలని యూఏఈ లక్ష్యంగా పెట్టుకుందని వెల్లడించారు.

వినియోగదారులకు సూచనలు
అనుమానాస్పద ఉత్పత్తులు లేదా తప్పుడు ప్రకటనలు కనిపిస్తే వెంటనే సంబంధిత అధికారులకు ఫిర్యాదు చేయాలని అధికారులు కోరుతున్నారు. వినియోగదారులు తమ భద్రత కోసం ఈ సూచనలు పాటించాలని సూచించారు.
* లైసెన్స్ పొందిన దుకాణాలు, ధృవీకరించిన వెబ్‌సైట్లలో మాత్రమే కొనుగోలు చేయాలి.
* ప్యాకేజింగ్, ఉత్పత్తి వివరాలు, తయారీ దేశం, గడువు తేదీని పరిశీలించాలి.
* బిల్లులు, రసీదులు, వారంటీ పత్రాలను భద్రంగా ఉంచుకోవాలి.
* సోషల్ మీడియా లేదా అనధికారిక విక్రేతల నుంచి కొనుగోళ్లు చేయకూడదు.
* అనుమానాస్పద ఉత్పత్తులు లేదా మోసపూరిత ప్రకటనలను వెంటనే అధికారులకు తెలియజేయాలి.