దోహా: దోహాలోని ఇండస్ట్రియల్ ఏరియా*లో ఉన్న ఓ గోదాం(వేర్ హౌజ్)లో అగ్నిప్రమాదం చోటుచేసుకుంది. ఘటనపై వెంటనే స్పందించిన సివిల్ డిఫెన్స్ బృందాలు మంటలను అదుపులోకి తీసుకువచ్చాయి.

ఈ మేరకు ఖతార్ అంతర్గత వ్యవహారాల మంత్రిత్వ శాఖ (Ministry of Interior) తన అధికారిక సోషల్ మీడియా వేదికల ద్వారా ఒక ప్రకటన విడుదల చేసింది. అగ్నిప్రమాదం జరిగిన వెంటనే సిబ్బంది సంఘటనా స్థలానికి చేరుకుని వేగంగా సహాయక చర్యలు చేపట్టారని, మంటలను పూర్తిగా అదుపులోకి తెచ్చినట్లు తెలిపింది.

ఈ ఘటనలో ఎలాంటి ప్రాణనష్టం లేదా గాయాలు సంభవించలేదని అధికారులు స్పష్టం చేశారు. అయితే, అగ్నిప్రమాదానికి గల కారణాలు, ఆస్తి నష్టం వివరాలను అధికారులు ఇంకా వెల్లడించలేదు. ఘటనపై దర్యాప్తు కొనసాగుతున్నట్లు తెలిపారు.