రియాద్: సౌదీ అరేబియా వాణిజ్య మంత్రిత్వ శాఖ 2025 మోడల్‌కు చెందిన 339 సుజుకి గ్రాండ్ విటారా వాహనాలను రీకాల్ చేస్తున్నట్లు ప్రకటించింది. ఇన్‌స్ట్రుమెంట్ క్లస్టర్‌లో ఉన్న సాంకేతిక లోపం కారణంగా ఇంధన స్థాయిని (ఫ్యూయల్ గేజ్) తప్పుగా చూపించే అవకాశం ఉందని వెల్లడించింది. ఈ లోపం వల్ల వాహనం రన్నింగ్ సమయంలో మధ్యలోనే ఆగిపోయే ప్రమాదం ఉందని, తద్వారా రోడ్డు ప్రమాదాల ముప్పు పెరిగే అవకాశం ఉందని మంత్రిత్వ శాఖ హెచ్చరించింది.

ప్రభావిత వాహనాల యజమానులు తమ వాహన గుర్తింపు సంఖ్య (VIN) రీకాల్ జాబితాలో ఉందో లేదో అధికారిక వెబ్‌సైట్ ద్వారా తనిఖీ చేసుకోవాలని సూచించింది. అలాగే, అవసరమైన మరమ్మతుల కోసం అధీకృత డీలర్ ‘నజీబ్ ఆటో’ను టోల్ ఫ్రీ నెంబర్ 8002444441 లో సంప్రదించాలని, ఈ మరమ్మతులు ఉచితంగా నిర్వహించబడతాయని తెలిపింది.