రియాద్: గాయాలకు ఉపయోగించే డ్రెస్సింగ్‌లు, వౌండ్ కంప్రెస్‌లకు అంతర్జాతీయ ప్రమాణాలను రూపొందించే ఇంటర్నేషనల్ ఆర్గనైజేషన్ ఫర్ స్టాండర్డైజేషన్ (ISO) సాంకేతిక కమిటీ ISO/TC 357కు సౌదీ అరేబియా నేతృత్వం వహించనుంది. ఈ కమిటీకి నాయకత్వం వహిస్తున్న మిడిలీస్టులోని  తొలి దేశంగా సౌదీ నిలిచింది.  ఈ ఘనత సౌదీ ఫుడ్ అండ్ డ్రగ్ అథారిటీ (SFDA), సౌదీ స్టాండర్డ్స్, మెట్రాలజీ అండ్ క్వాలిటీ ఆర్గనైజేషన్ (SASO) సంయుక్త కృషి ఫలితంగా సాధ్యమైందని అధికారులు తెలిపారు.

ఈ కమిటీకి సెక్రటేరియట్‌గా SFDA వ్యవహరించనుండగా, గాయాల డ్రెస్సింగ్‌లు, వౌండ్ కంప్రెస్‌లకు సంబంధించిన భద్రతా ప్రమాణాలు, పనితీరు ప్రమాణాలు, పరీక్షా విధానాలు, నాణ్యత నియంత్రణ వంటి అంశాలపై అంతర్జాతీయ ప్రమాణాల రూపకల్పనకు సాంకేతికంగా నాయకత్వం వహించనుంది. ఈ రంగంలో ప్రపంచవ్యాప్తంగా యూనిఫైడ్ ప్రమాణాల అవసరాన్ని దృష్టిలో ఉంచుకుని SFDA ఈ కమిటీ ఏర్పాటును ప్రతిపాదించగా, ISOతో పాటు వివిధ దేశాల ప్రమాణాల సంస్థలతో సాంకేతిక, పరిపాలనా సమన్వయాన్ని SASO నిర్వహించింది.

ISO సాంకేతిక కమిటీలు, టెక్నికల్ మేనేజ్‌మెంట్ బోర్డు (ISO/TMB) పరిశీలన అనంతరం సౌదీ ప్రతిపాదనకు ఆమోదం లభించింది. కమిటీ ఏర్పాటుకు 27 దేశాలు అనుకూలంగా ఓటు వేయగా, 13 దేశాలు పాల్గొనే సభ్యులుగా, 21 దేశాలు పరిశీలక సభ్యులుగా చేరాయి. ఈ విజయంతో అంతర్జాతీయ ప్రమాణాలు, నాణ్యతా వ్యవస్థల రూపకల్పనలో సౌదీ అరేబియా కీలక పాత్ర పోషిస్తోందని, దేశ సాంకేతిక నైపుణ్యంపై ప్రపంచ దేశాల విశ్వాసానికి ఇది నిదర్శనమని అధికారులు పేర్కొన్నారు.