విశాఖలో 'శభాష్ నాయుడు' సందడి చేయబోతున్నాడు. ఈ శభాష్ నాయుడు ఎవరో 'దశావతారం' చిత్రం చూసిన వారికి తేలిగ్గా అర్ధమవుతుంది. విలక్షణ నటుడు కమల్‌హాసన్ అందులో పోషించిన పాత్ర పేరే 'శభాష్ నాయుడు'. ఆ పాత్రకు సినిమాలో మంచిపేరు రావడంతో అదే గెటప్‍, అదే టైటిల్‌తో కమల్ హీరోగా తెలుగు, తమిళ, హిందీ భాషల్లో 'శభాష్ నాయుడు' రూపొందుతోంది. ఇటీవల కమల్ కుడికాలికి గాయం కావడంతో తదుపరి షెడ్యూల్ వాయిదా పడింది. గతవారమే ఆసుపత్రి నుంచి డిశ్చార్చ్ అయిన కమల్ ఇప్పుడు దాదాపు కోలుకున్నారు. సైకోథెరపీతో పాటు కాలికి బలం పుంజుకునేందుకు జిమ్మింగ్ కూడా ప్రారంభించారు. ఈ నేపథ్యంలో మళ్లీ 'శభాష్ నాయుడు' తదుపరి షెడ్యూల్‌కు ప్లాన్ చేస్తున్నారు. సెప్టెంబర్ రెండో వారంలో విశాఖపట్నంలో ఈ షెడ్యూల్ మొదలుకానుంది. ఇంతవరకూ సగం షూటింగ్ పూర్తి చేసుకున్న ఈ చిత్రంలో కమల్‌తో పాటు శృతిహాసన్, బ్రహ్మానందం, రమ్యకృష్ణ, సౌరబ్ శుక్లా తదితరులు నటిస్తున్నారు. ఇళయరాజా సంగీతం అందిస్తున్నారు. కథ, సహనిర్మాణంతో పాటు కమల్ స్వీయదర్శకత్వంలో ఈ చిత్రం రూపొందుతోంది.