హైదరాబాద్: శాస్త్రీయ ఆధారాలు, నాణ్యమైన ఫోరెన్సిక్ నివేదికలు లేకపోతే ఎంత పకడ్బందీగా దర్యాప్తు చేసినా కోర్టులో కేసు నిలబడదని తెలంగాణ డీజీపీ సీవీ ఆనంద్ అన్నారు. హైదరాబాద్‌లోని తెలంగాణ ఫోరెన్సిక్ సైన్స్ ల్యాబొరేటరీ (FSL) ప్రధాన కార్యాలయంలో 57 మంది నూతనంగా నియమితులైన సిబ్బందికి నియామక పత్రాలను అందజేసిన సందర్భంగా ఆయన ఈ వ్యాఖ్యలు చేశారు.

కొత్త క్రిమినల్ చట్టాలు శాస్త్రీయ, సాంకేతిక ఆధారిత దర్యాప్తుకు అధిక ప్రాధాన్యం ఇస్తున్న నేపథ్యంలో, కొత్తగా చేరిన అధికారులు తమ నైపుణ్యాలను మరింత మెరుగుపరుచుకోవాలని డీజీపీ సూచించారు. చార్జిషీట్ల రూపకల్పనలో ఫోరెన్సిక్ నివేదికలు కీలకమని, సాక్ష్యాలను సక్రమంగా సేకరించడం, విశ్లేషించడం, కోర్టులో సమర్థవంతంగా సమర్పించకపోతే నిందితులు శిక్ష నుంచి తప్పించుకునే అవకాశం ఉంటుందని హెచ్చరించారు.

కోర్టు విధానాలు, సాక్ష్యాల నిర్వహణ, డాక్యుమెంటేషన్‌పై పూర్తి అవగాహన పెంపొందించుకోవడంతో పాటు అత్యున్నత స్థాయి ఖచ్చితత్వం, శాస్త్రీయ నిబద్ధతను పాటించాలని కొత్త సిబ్బందికి సూచించారు.

రాష్ట్రంలో మాదకద్రవ్యాలు, సైబర్ నేరాలు, ఆర్థిక మోసాల కేసులు పెరుగుతున్న నేపథ్యంలో ఫోరెన్సిక్ నిపుణుల పాత్ర మరింత కీలకంగా మారిందని డీజీపీ పేర్కొన్నారు. ఇప్పటి వరకు తెలంగాణ ఎఫ్‌ఎస్‌ఎల్‌లో కేవలం 38 మంది సిబ్బంది మాత్రమే ఉండటంతో నివేదికల జారీ ఆలస్యమవుతోందన్నారు.

కొత్తగా నియమితులైన 57 మందిలో 36 మంది పీహెచ్‌డీ, 15 మంది ఎం.టెక్ అర్హతలు కలిగి ఉండటం ల్యాబ్ శాస్త్రీయ సామర్థ్యాన్ని గణనీయంగా పెంచడంతో పాటు పెండింగ్ కేసుల తగ్గింపునకు దోహదపడుతుందని ఆయన విశ్వాసం వ్యక్తం చేశారు. ఆధునిక పరికరాలు, మౌలిక సదుపాయాల కల్పనకు ప్రభుత్వం నుంచి పూర్తి సహకారం అందిస్తామని హామీ ఇచ్చారు.

ఈ సందర్భంగా ఎఫ్‌ఎస్‌ఎల్ డైరెక్టర్ శిఖా గోయల్ మాట్లాడుతూ, కొత్తగా నియమితులైన సిబ్బందికి ఐదు నెలల శిక్షణ కార్యక్రమం నిర్వహించనున్నట్లు తెలిపారు. ప్రస్తుతం తెలంగాణ ఫోరెన్సిక్ సైన్స్ ల్యాబ్ సుమారు 80 శాతం కేసుల పరిష్కార రేటును కొనసాగిస్తోందని, పోక్సో కేసులకు సంబంధించిన ఫోరెన్సిక్ నివేదికలను రెండు నెలల్లోపు జారీ చేస్తున్నట్లు వెల్లడించారు.