మస్కట్: ఒమాన్‌లోని భారత రాయబార కార్యాలయం (ఎంబసీ ఆఫ్ ఇండియా) "ఇండియా త్రూ మై లెన్స్" (India Through My Lens) పేరుతో ప్రత్యేక ఫోటోగ్రఫీ పోటీని నిర్వహిస్తోంది. ఒమాన్ సుల్తానేట్‌లో నివసిస్తున్న అన్ని వయస్సుల ఫోటోగ్రఫీ ఆసక్తిగల వారు ఈ పోటీలో పాల్గొనవచ్చని ఎంబసీ ప్రకటించింది.

ఈ పోటీలో భారతదేశాన్ని తమదైన దృక్కోణంలో ప్రతిబింబించే ఫోటోలను పంపించాలని నిర్వాహకులు కోరుతున్నారు. భారతదేశంలోని అద్భుతమైన ప్రకృతి దృశ్యాలు, సుసంపన్నమైన సాంస్కృతిక వారసత్వం, రంగుల సంప్రదాయాలు, శాస్త్ర సాంకేతిక రంగంలోని విజయాలు, ఆధునిక పట్టణ అభివృద్ధి వంటి అంశాలను ప్రతిబింబించే చిత్రాలకు ప్రాధాన్యం ఇవ్వనున్నారు.

పోటీలో ఎంపికైన తొలి మూడు విజేతలను 2026 ఆగస్టు 15న జరిగే భారత 80వ స్వాతంత్ర్య దినోత్సవ వేడుకల్లో ఘనంగా సత్కరించనున్నారు. అలాగే ఎంపికైన ఇతర ఉత్తమ ఫోటోలను కూడా స్వాతంత్ర్య దినోత్సవ వేడుకల సందర్భంగా ప్రదర్శించి, ఫోటోగ్రాఫర్లను అభినందించనున్నారు.

ఫోటోలను పంపేందుకు చివరి తేదీ 2026 ఆగస్టు 8. ఆసక్తి గల వారు తమ ఎంట్రీలను [email protected] కు పంపాలని భారత రాయబార కార్యాలయం సూచించింది.