టెహ్రాన్: వ్యూహాత్మక ప్రాధాన్యం కలిగిన హోర్ముజ్ జలసంధిలో కొత్త సముద్ర రవాణా మార్గం ఏర్పాటుకు ఇరాన్, ఒమాన్ మధ్య కీలక పురోగతి చోటుచేసుకుంది. ప్రస్తుతం అమల్లో ఉన్న సముద్ర మార్గాలకు భిన్నంగా, ఇరు దేశాల సార్వభౌమాధికారాన్ని గౌరవించే కొత్త నౌకాయాన మార్గంపై త్వరలోనే అవగాహనకు వచ్చే అవకాశముందని ఇరాన్ విదేశాంగ మంత్రిత్వ శాఖ వెల్లడించింది.

ఇరాన్ విదేశాంగ మంత్రిత్వ శాఖ ప్రతినిధి ఇస్మాయిల్ బఘాయీ ఆదివారం ప్రభుత్వ టెలివిజన్‌కు ఇచ్చిన ఇంటర్వ్యూలో ఈ విషయాన్ని వెల్లడించారు. ఇరాన్, ఒమాన్‌కు ఆమోదయోగ్యమైన కొత్త సముద్ర మార్గంపై చర్చలు తుది దశకు చేరుకున్నాయని తెలిపారు.

"ప్రస్తుతం అమల్లో ఉన్న ఉత్తర లేదా దక్షిణ మార్గాలకంటే భిన్నంగా, ఇరు దేశాల సార్వభౌమ హక్కులను గౌరవిస్తూ, జాతీయ ప్రయోజనాలు మరియు భద్రతను పరిరక్షించే కొత్త మార్గంపై పరస్పర అవగాహనకు చేరువలో ఉన్నాం" అని బఘాయీ పేర్కొన్నారు.

హోర్ముజ్ జలసంధి ప్రపంచ చమురు రవాణాలో అత్యంత కీలకమైన సముద్ర మార్గంగా గుర్తింపు పొందింది. ఈ నేపథ్యంలో కొత్త సముద్ర మార్గంపై ఇరాన్–ఒమాన్ మధ్య కుదిరే ఒప్పందం ప్రాంతీయ సముద్ర రవాణా, భద్రతా వ్యవస్థలపై ప్రభావం చూపే అవకాశం ఉందని విశ్లేషకులు భావిస్తున్నారు.

ఇటీవలి కాలంలో హోర్ముజ్ జలసంధి ప్రాంతంలో భద్రతా ఉద్రిక్తతలు కొనసాగుతున్న నేపథ్యంలో, ఇరు దేశాలు పరస్పర ప్రయోజనాలు, భద్రతా అంశాలను దృష్టిలో ఉంచుకుని కొత్త మార్గంపై చర్చలు జరపడం ప్రాధాన్యత సంతరించుకుంది. త్వరలోనే ఈ అంశంపై అధికారిక ఒప్పందం కుదిరే అవకాశాలు ఉన్నట్లు ఇరాన్ సంకేతాలు ఇచ్చింది.