₹220 కోట్లు ఖర్చు చేసి కుక్కలా మారిన 26 ఏళ్ల కోటీశ్వరుడా? ‘జాసో డాగ్ ట్రాన్స్‌ఫర్మేషన్’ వైరల్ క్లెయిమ్‌పై ఫ్యాక్ట్ చెక్

సోషల్ మీడియాలో ప్రస్తుతం ‘జాసో డాగ్ ట్రాన్స్‌ఫర్మేషన్’ పేరుతో ఓ వీడియో, కథనం వైరల్‌గా మారింది. జపాన్‌కు చెందిన 26 ఏళ్ల కోటీశ్వరుడు ‘జాసో’ అనే వ్యక్తి కుక్కలా కనిపించేందుకు ఏకంగా రూ.220 కోట్లు ఖర్చు చేశాడంటూ ప్రచారం జరుగుతోంది. ఈ వీడియోలు ప్రపంచవ్యాప్తంగా మిలియన్ల కొద్దీ వ్యూస్ సొంతం చేసుకుంటున్నప్పటికీ, ఈ సంచలన వాదనకు ఇప్పటివరకు ఎలాంటి స్వతంత్ర లేదా అధికారిక ధృవీకరణ లభించలేదు.

వైరల్ పోస్టుల ప్రకారం..జాసో అనే జపాన్‌కు చెందిన యువ కోటీశ్వరుడు కుక్కలా కనిపించేందుకు అత్యంత ఖరీదైన సర్జరీలు, ఇతర వైద్య ప్రక్రియలు చేయించుకున్నట్లు చెబుతున్నారు. సోషల్ మీడియాలో వైరల్ అవుతున్న కొన్ని వీడియోల్లో ఓ వ్యక్తి కుక్కలా దుస్తులు ధరించి, అదే విధంగా కదులుతున్నట్లు కనిపిస్తున్నాడు. దీంతో ఆ వీడియోనే ఈ కథనానికి ఆధారంగా చూపిస్తున్నారు.

అయితే, వీడియోలో కనిపిస్తున్న వ్యక్తి నిజంగా ‘జాసో’ అనే వ్యక్తేనా? అతను 26 ఏళ్ల కోటీశ్వరుడేనా? కుక్కలా మారేందుకు నిజంగానే రూ.220 కోట్లు ఖర్చు చేశాడా? అనే అంశాలకు సంబంధించి ఇప్పటివరకు విశ్వసనీయ ఆధారాలు లేవు.

కీలక అంశాలకు ఆధారాలు లేవు

ఈ వైరల్ కథనంలో ప్రధానంగా పేర్కొంటున్న నాలుగు అంశాలు ఇప్పటివరకు స్వతంత్రంగా నిర్ధారణ కాలేదు. అవి:

• ‘జాసో’ అనే వ్యక్తి గుర్తింపు
• అతని వయస్సు 26 సంవత్సరాలు అన్న వాదన
• అతను కోటీశ్వర వ్యాపారవేత్త అన్న సమాచారం
• కుక్కలా మారేందుకు రూ.220 కోట్లు ఖర్చు చేశాడన్న ప్రచారం

అధికారిక లేదా విశ్వసనీయ వర్గాల నుంచి ఈ వివరాలపై ఎలాంటి నిర్ధారణ వెలువడలేదు.

కొత్త ఇన్‌స్టాగ్రామ్ వీడియో ఏం చెబుతోంది?

ఇదిలా ఉండగా, తాజాగా వైరల్ అవుతున్న మరో ఇన్‌స్టాగ్రామ్ వీడియో ఈ మొత్తం కథనాన్నే తప్పుబడుతోంది. వైరల్ క్లిప్‌లలో కనిపిస్తున్నది మనిషి కుక్కలా మారిన దృశ్యం కాదని, అరుదైన పురాతన హెయిర్‌లెస్ డాగ్ జాతికి చెందిన కుక్క అని ఆ వీడియోలో పేర్కొన్నారు.

ఈ జాతి కుక్కలు సహజంగానే వెంట్రుకలు లేకుండా పుడతాయని, వాటి చర్మం మనిషి చర్మాన్ని పోలి కనిపించవచ్చని వీడియోలో వివరించారు.

కొన్ని సోషల్ మీడియా పేజీలు ఈ కుక్కకు సంబంధించిన వీడియోలను తీసుకుని, వాటికి ‘జాసో’ అనే కోటీశ్వరుడు రూ.220 కోట్లు ఖర్చు చేసి కుక్కగా మారాడనే కల్పిత కథను జోడించాయని కూడా ఆ వీడియో ఆరోపిస్తోంది. కేవలం వ్యూస్, లైక్స్, షేర్లు, ఎంగేజ్‌మెంట్ పెంచుకోవడం కోసమే ఈ కథనాన్ని సృష్టించి ఉండొచ్చని పేర్కొంది.

నిజమేనా..ఫేక్ ప్రచారమా?

ప్రస్తుతం అందుబాటులో ఉన్న సమాచారాన్ని బట్టి ‘జాసో’ అనే 26 ఏళ్ల కోటీశ్వరుడు రూ.220 కోట్లు ఖర్చు చేసి కుక్కలా మారాడు అనే వాదనకు ఆధారాలు లేవు. అలాగే, అలాంటి సర్జరీ లేదా రూపాంతరం నిజంగా జరిగిందని నిర్ధారించే ఆధారాలు కూడా బయటకు రాలేదు.

కాబట్టి ఈ వీడియోలను నిజమని నమ్మి షేర్ చేసే ముందు వాటి మూలం, విశ్వసనీయతను పరిశీలించడం అవసరం. అధికారిక లేదా స్వతంత్ర ధృవీకరణ వెలువడే వరకు ‘జాసో డాగ్ ట్రాన్స్‌ఫర్మేషన్’ కథనాన్ని ధృవీకరించని వైరల్ క్లెయిమ్‌గానే చూడాలి.