మస్కట్: వినియోగదారులకు మరింత సులభంగా సేవలు అందించేందుకు ఒమన్‌ వినియోగదారుల రక్షణ అథారిటీ (CPA) కొత్త డిజిటల్ ప్లాట్‌ఫామ్‌ను తీసుకురానుంది. ‘కన్స్యూమర్ పాస్‌పోర్ట్’ పేరుతో రూపొందిస్తున్న ఈ సేవ ద్వారా ఒకే డిజిటల్ గుర్తింపుతో CPAకు సంబంధించిన పలు సేవలను వినియోగదారులు పొందే అవకాశం కల్పించనున్నారు. 

వినియోగదారుల ఫిర్యాదులు, నివేదికలు, వివిధ సేవలు, అలర్ట్‌లను ఒకే డిజిటల్ ఖాతాలోకి తీసుకురావడం ఈ కొత్త ప్లాట్‌ఫామ్ ద్వారా అందించనున్నారు.  CPA తన సోషల్ మీడియా వేదికల ద్వారా ఈ కొత్త సేవను ప్రకటించింది. వినియోగదారులకు ఇది “పూర్తిగా భిన్నమైన అనుభవం” అందిస్తుందని పేర్కొంది. ప్రస్తుతం ప్రచార సామగ్రిలో ‘త్వరలో అందుబాటులోకి’ అని పేర్కొన్నప్పటికీ.. అధికారికంగా ఎప్పుడు ప్రారంభిస్తారనే తేదీని మాత్రం CPA వెల్లడించలేదు.

కొత్త విధానంలో వినియోగదారులు తమ వ్యక్తిగత ప్రొఫైల్‌ను యాక్సెస్ చేసి, CPAతో తమకు సంబంధించిన అన్ని వ్యవహారాలను ఒకే డిజిటల్ గుర్తింపు ద్వారా నిర్వహించుకోవచ్చు. వివిధ సేవల కోసం వేర్వేరు ఛానళ్లు, విధానాలను అనుసరించాల్సిన అవసరాన్ని తగ్గించడంతో పాటు సేవలను వేగంగా పొందే అవకాశం కల్పించనున్నారు. వినియోగదారులకు సంబంధించిన సేవలు, సమాచారం, డేటాను ఒకే చోట అందుబాటులోకి తీసుకురావడం ద్వారా సేవలను మరింత సులభంగా, పారదర్శకంగా మార్చాలని CPA లక్ష్యంగా పెట్టుకుంది.