సౌదీలో విరాళాల సేకరణ.. పిల్లలను ఉపయోగించడంపై నిషేధం..!
- August 13, 2026
రియాద్: విరాళాల సేకరణ కార్యక్రమాల్లో పారదర్శకత, విశ్వసనీయతను పెంచేందుకు సౌదీ అరేబియా నాన్-ప్రాఫిట్ సెక్టార్ కోసం జాతీయ కేంద్రం కొత్త ముసాయిదా నిబంధనలను విడుదల చేసింది. ఈ ప్రతిపాదిత ఫండ్ రైజింగ్ గవర్నెన్స్ రూల్స్ (Fundraising Governance Rules)లో భాగంగా విరాళాల సేకరణ ప్రకటనలు, ప్రచార కార్యక్రమాల్లో పిల్లలను ఉపయోగించడాన్ని నిషేధించే నిబంధనను ప్రతిపాదించారు. ఈ ముసాయిదా నిబంధనలను ప్రజల అభిప్రాయాలు, సూచనల కోసం ఇస్తిత్లా (Istitlaa) పబ్లిక్ సర్వే ప్లాట్ఫామ్ లో అందుబాటులో ఉంచారు. ప్రజలు సెప్టెంబర్ 10 వరకు తమ అభిప్రాయాలను తెలియజేయవచ్చు.
ప్రతిపాదిత నిబంధనల ప్రకారం విరాళాలు సేకరించే సంస్థలు ప్రత్యేక లైసెన్స్ పొందాలి. ఇందుకోసం సంస్థకు ఆ కార్యకలాపాలను నిర్వహించేందుకు చట్టబద్ధమైన అనుమతి ఉండాలి. కనీస పాలనా ప్రమాణాలను పాటించడంతో పాటు, దరఖాస్తుకు ముందు ఏడాది కాలంలో తీవ్రమైన ఉల్లంఘనలు నమోదై ఉండకూడదు.అంతేకాకుండా సంబంధిత ప్రభుత్వ సంస్థల నుంచి అవసరమైన అనుమతులు పొందాలి. విరాళాల సేకరణ లక్ష్యాలు, ఖర్చులతో కూడిన సమగ్ర ప్రణాళికను కూడా సమర్పించాల్సి ఉంటుంది. మొత్తం 18 ఆర్టికల్స్తో రూపొందించిన ముసాయిదాలో ప్రతి లైసెన్స్ను నిర్దిష్ట కార్యక్రమం లేదా లక్ష్యం కోసం మాత్రమే జారీ చేయాలని ప్రతిపాదించారు. లైసెన్స్ గడువు, వస్తు రూపంలోని విరాళాల సేకరణకు సంబంధించిన భౌగోళిక పరిధిని కూడా స్పష్టంగా పేర్కొనాల్సి ఉంటుంది.
ప్రకటనల్లో QR కోడ్ తప్పనిసరి
విరాళాల కోసం చేసే ప్రకటనల్లో ‘Donate Safely’ సేవకు సంబంధించిన QR కోడ్ ఉండాలి. దీని ద్వారా దాతలు సంబంధిత సంస్థకు చెల్లుబాటు అయ్యే లైసెన్స్ ఉందా? ఆ లైసెన్స్ పరిధి ఎంత? అనే విషయాలను ధృవీకరించుకోవచ్చు. ప్రకటనల్లో తప్పుడు, అతిశయోక్తి లేదా తప్పుదారి పట్టించే సమాచారం ఉండకూడదు. ఖచ్చితమైన ప్రతిఫలం లభిస్తుందనే హామీలు ఇవ్వడం, మతపరమైన వచనాలను తప్పుగా అర్థం వచ్చేలా ఉపయోగించడం కూడా నిషేధించనున్నారు.అదేవిధంగా పిల్లలను ప్రకటనల్లో ఉపయోగించడం, దాతృత్వ కార్యక్రమాల ప్రతిష్ఠకు భంగం కలిగించే లేదా వివాదాలకు దారితీసే కంటెంట్ను ప్రచురించడం నిషేధించాలని ప్రతిపాదించారు.
విరాళాలు అందుకునే లబ్ధిదారుల గౌరవం, వ్యక్తిగత గోప్యతను కాపాడేందుకు కూడా నిబంధనలు ప్రతిపాదించారు. వారి మానవతా పరిస్థితులను దుర్వినియోగం చేసే విధంగా ఫొటోలు తీయడం లేదా ప్రదర్శించడంపై నిషేధం విధించారు. అలాగే వ్యక్తిగత ఫోన్ నంబర్లు వంటి సమాచారాన్ని ప్రచార సందేశాల కోసం ఉపయోగించే ముందు సంబంధిత వ్యక్తుల అనుమతి తీసుకోవాలి. వారు ఎప్పుడైనా ప్రచార సందేశాల నుంచి వైదొలిగే అవకాశం కల్పించాలి.
తాజా వార్తలు
- బైక్లు, క్యాంప్సైట్ అద్దె పేరుతో ఆన్లైన్ మోసాలు..
- దుబాయ్లో ఘనంగా తెలుగు చార్టర్డ్ అకౌంటెంట్ల వనభోజనాలు.. 350 మందికి పైగా హాజరు
- బహ్రెయిన్పై ఇరాన్ దాడిని ఖండించిన ఖతార్
- యెమెన్లో వారం రోజుల్లో 1,269 పేలుడు పదార్థాలను నిర్వీర్యం చేసిన సౌదీ మసామ్ ప్రాజెక్టు
- లిబియాలో రష్యా నౌకపై డ్రోన్ దాడి అనుమానం.. బెంఘాజీ నౌకాశ్రయంలో భారీ పేలుడు
- రష్యా పౌరుడిని ఎయిర్ లిఫ్ట్ చేసిన ఒమన్ ఎయిర్ ఫోర్స్..!!
- సౌదీలో అక్రమ నివాసులపై భారీ చర్యలు..!!
- ఖతార్లో ఇక పేపర్ సిక్లీవ్ సర్టిఫికెట్లకు సెలవు..!
- కువైట్లో 10 మంది అరెస్ట్, 6 వాహనాలు స్వాధీనం..!!
- ఇరాన్ దాడులపై UN కు బహ్రెయిన్ ఫిర్యాదు..!!







