మస్కట్: సోషల్ మీడియాలో లైవ్ ప్రసారం ద్వారా ప్రజా నైతిక విలువలకు విరుద్ధమైన కంటెంట్‌ను ప్రచురించిన కేసులో ఓ అరబ్ మహిళకు ఒమన్ కోర్టు ఏడాది జైలు శిక్ష విధించింది. శిక్ష పూర్తైన అనంతరం ఆమెను దేశం నుంచి శాశ్వతంగా బహిష్కరించాలని ఆదేశించింది.

సీబ్ విలాయత్‌లోని ఫస్ట్ ఇన్‌స్టాన్స్ కోర్టు ఈ తీర్పు వెలువరించింది. సమాచార నెట్‌వర్క్, సమాచార సాంకేతిక సాధనాలను ఉపయోగించి ప్రజా నైతిక విలువలకు విరుద్ధమైన కంటెంట్‌ను రూపొందించి ప్రచురించిన నేరానికి మహిళను దోషిగా తేల్చింది. శిక్షలో భాగంగా నేరానికి ఉపయోగించిన ఎలక్ట్రానిక్ పరికరాన్ని స్వాధీనం చేసుకోవడంతో పాటు, సంబంధిత సోషల్ మీడియా ఖాతాలను మూసివేయాలని, తీర్పును ప్రచురించాలని కోర్టు ఆదేశించింది.

ప్రాసిక్యూషన్ దర్యాప్తులో.. నిందితురాలు సోషల్ మీడియాలో నిర్వహించిన లైవ్ ప్రసారంలో ప్రజా నైతిక విలువలకు విరుద్ధమైన కంటెంట్, ప్రవర్తన ఉన్నట్లు గుర్తించారు. దీంతో ఆమెపై చట్టపరమైన చర్యలు తీసుకుని సంబంధిత కోర్టులో హాజరుపరిచారు.

సోషల్ మీడియాను బాధ్యతాయుతంగా వినియోగించాలని ఒమన్ పబ్లిక్ ప్రాసిక్యూషన్ ప్రజలకు సూచించింది. ప్రజా క్రమం లేదా నైతిక విలువలకు విరుద్ధమైన కంటెంట్‌ను ప్రచురించడం, షేర్ చేయడం లేదా ప్రసారం చేయడం వంటి చర్యలకు దూరంగా ఉండాలని కోరింది. ఒమన్ సమాజ విలువలు, సంప్రదాయ నైతిక ప్రమాణాలను పరిరక్షించడంలో పౌరులు, నివాసితులు చూపుతున్న అవగాహనను పబ్లిక్ ప్రాసిక్యూషన్ అభినందించింది.