కువైట్ : 21 ఏళ్లలోపు వారికి పొగాకు, నికోటిన్ ఉత్పత్తులను విక్రయించడాన్ని కువైట్ ప్రభుత్వం నిషేధించింది. ప్రజారోగ్యాన్ని కాపాడటం, పొగాకు, నికోటిన్ వినియోగం వల్ల కలిగే ఆరోగ్య, సామాజిక నష్టాలను తగ్గించడమే లక్ష్యంగా కొత్త నిబంధనలు తీసుకొచ్చింది.  ఈ మేరకు కువైట్ ఆరోగ్య మంత్రి డాక్టర్ అహ్మద్ అల్ అవధీ మినిస్టీరియల్ రిజల్యూషన్ నంబర్ 237 ఆఫ్ 2026ను జారీ చేశారు. దీని ప్రకారం.. సిగరెట్లు, ఈ-సిగరెట్లు, హీటెడ్ టొబాకో ఉత్పత్తులు, నికోటిన్ లిక్విడ్లు, కార్ట్రిడ్జ్‌లు, నికోటిన్ పౌచ్‌లు, పొగలేని పొగాకు తదితర ఉత్పత్తుల విక్రయంపై కొత్త ఆంక్షలు అమల్లోకి రానున్నాయి.

అలాగే, కిరాణా దుకాణాలు, మొబైల్ కార్టులు, కియోస్క్‌లు, వెండింగ్ మెషీన్లు, ఎగ్జిబిషన్లు, వినోద కార్యక్రమాల్లో వీటి విక్రయాన్ని నిషేధించారు. వీటితోపాటు పాఠశాలలు, విశ్వవిద్యాలయాలు, ఆసుపత్రులు, ప్రభుత్వ సంస్థలు, స్పోర్ట్స్ క్లబ్‌లు, యువజన కేంద్రాలు, సినిమా థియేటర్లు, పిల్లలు, యువతకు సంబంధించిన కేంద్రాల్లో వీటి విక్రయాలు, ప్రదర్శనపై కూడా నిషేధం ఉంటుంది.

వెబ్‌సైట్లు, మొబైల్ యాప్‌లు, సోషల్ మీడియా, డెలివరీ సేవల ద్వారా విక్రయించడంపైనా ఆంక్షలు విధించారు. విద్యా సంస్థలకు 200 మీటర్ల పరిధిలో ఉన్న దుకాణాల్లో కూడా వీటి విక్రయాన్ని నిషేధించారు.

కో-ఆపరేటివ్ సొసైటీలు, ఇతర మార్కెట్లలో విక్రయించే నికోటిన్ ఉత్పత్తులను ప్రత్యేకంగా కేటాయించిన, పర్యవేక్షణలో ఉన్న ప్రదేశాల్లో మాత్రమే ప్రదర్శించాలి. ప్రతి ఉత్పత్తి ఆరోగ్య మంత్రిత్వ శాఖ వద్ద రిజిస్టర్ అయి, అనుమతి పొందాలి. అలాగే నిర్దేశిత భద్రతా ప్రమాణాలను పాటించడంతో పాటు.. ప్యాకెట్ ముందు భాగంలో కనీసం 50 శాతం స్థలంలో ఆరోగ్య హెచ్చరికలు ఉండాలి.

ప్రకటనలు, డిస్కౌంట్లపైనా నిషేధం

పొగాకు, నికోటిన్ ఉత్పత్తులకు ప్రకటనలు ఇవ్వడం, ప్రచారం చేయడం, స్పాన్సర్ చేయడం, ఉచిత నమూనాలు పంపిణీ చేయడం, బహుమతులు ఇవ్వడం, డిస్కౌంట్లు ప్రకటించడాన్ని కూడా నిషేధించారు. అదేవిధంగా ఈ-సిగరెట్లు, హీటెడ్ టొబాకో ఉత్పత్తులను స్మోకింగ్ నిషేధించిన ప్రదేశాల్లో సిగరెట్లతో సమానంగా పరిగణిస్తారు. కొత్త నిబంధనలు 2027 జనవరి 1 నుంచి అమల్లోకి రానున్నాయి. నిబంధనల అమలును ఆరోగ్య మంత్రిత్వ శాఖతో పాటు సంబంధిత ప్రభుత్వ విభాగాలు పర్యవేక్షించనున్నాయి.