మనామా: బహ్రెయిన్‌లోని కొన్ని విద్యా సంస్థల లైసెన్సులు, ఫీజుల వసూళ్లు, వాణిజ్య రిజిస్ట్రేషన్ల నిర్వహణపై సమగ్ర తనిఖీలు చేపట్టాలని ఎంపీ బసీమా ముబారక్ సంబంధిత అధికారులను కోరారు. కొన్ని విద్యా సంస్థల చట్టపరమైన స్థితిని పరిశీలించడంతో పాటు, అవి అందిస్తున్న విద్యా కార్యకలాపాలు వాటికి మంజూరైన లైసెన్సుల నిబంధనలకు అనుగుణంగా ఉన్నాయా లేదా అన్నది తనిఖీ చేయాలని ఆమె సూచించారు. అలాగే విద్యార్థుల నుంచి ఫీజులు ఎవరు వసూలు చేస్తున్నారో పరిశీలించాలని కోరారు. బహ్రెయిన్ పౌరుల పేర్లపై నమోదైన కమర్షియల్ రిజిస్ట్రేషన్లు (CR) ఇతరులు ఎలా ఉపయోగిస్తున్నారనే దానిపై కూడా తనిఖీలు అవసరమని పేర్కొన్నారు.

అరాద్‌లోని ఓ విద్యా సంస్థకు సంబంధించిన అంశాన్ని ప్రస్తావించిన ముబారక్.. ఆ సంస్థ నిర్వహిస్తున్న కార్యకలాపాలు లైసెన్సులో పేర్కొన్న వాటికి అనుగుణంగా ఉన్నాయా లేదా పరిశీలించాలని కోరారు.  ఫీజులు వసూలు చేస్తున్న వ్యక్తులు చట్టబద్ధంగా అనుమతి పొందారా? నిబంధనలను పాటిస్తున్నారా? అనే అంశాలను కూడా తనిఖీ చేయాలని కోరారు. ముహర్రక్ గవర్నరేట్‌లోని మరో విద్యా సంస్థ కూడా ఈ తనిఖీల పరిధిలోకి వస్తుందని ముబారక్ తెలిపారు. సంస్థ ప్రాంగణాన్ని పరిశీలించి, లైసెన్సును పరిశీలించాలని కోరారు.

బహ్రెయిన్ పౌరుల పేర్లపై ఉన్న కమర్షియల్ రిజిస్ట్రేషన్లను ఇతరులు ఉపయోగిస్తున్నారనే నివేదికలపై ముబారక్ పలు ప్రశ్నలు లేవనెత్తారు. ఇలాంటివి ఏవైనా ఉంటే, బహ్రెయిన్ చట్టాలు, నిబంధనలకు అనుగుణంగా చర్యలు తీసుకోవాలని ఆమె కోరారు.