దుబాయ్: యూఏఈలో కొత్త విద్యా సంవత్సరం ప్రారంభానికి కుటుంబాలు సిద్ధమవుతున్న వేళ.. స్కూల్ భోజన ఖర్చులు కూడా బ్యాక్-టు-స్కూల్ బడ్జెట్‌లో కీలకంగా మారుతున్నాయి. కొన్ని పాఠశాలల్లో ఒక్క స్నాక్‌ ధర Dh5 నుంచి ఉండగా, పూర్తి భోజనం కోసం Dh39 వరకు చెల్లించాల్సి వస్తోంది. దీంతో విద్యార్థులకు నెలకు సుమారు Dh600 నుంచి Dh800 వరకు ఖర్చయ్యే అవకాశం ఉందని విద్యారంగ నిపుణులు చెబుతున్నారు.

దుబాయ్‌లోని స్విస్ ఇంటర్నేషనల్ సైంటిఫిక్ స్కూల్‌లో తల్లిదండ్రులు టర్మ్, నెలవారీ లేదా రోజువారీ భోజన ప్యాకేజీలను ఎంచుకోవచ్చు. ప్యాకేజీని బట్టి ఒక్కో భోజనం ధర Dh28.50 నుంచి Dh39 వరకు ఉంటుంది.

అబుదాబిలోని బ్రిటిష్ ఇంటర్నేషనల్ స్కూల్‌లో ఫౌండేషన్ స్టేజ్, ప్రైమరీ విద్యార్థులకు ముందుగా ఆర్డర్ చేసే లంచ్ కాంబో Dh20గా ఉంది. వీటికి అదనంగా వాటర్ బాటిల్ ధర Dh3, జ్యూస్ Dh5 కాగా, వ్యక్తిగత స్నాక్స్ సాధారణంగా Dh5–Dh10 మధ్య ఉంటాయి.

ఇక సెకండరీ విద్యార్థులకు మరింత స్వేచ్ఛ ఉంటుంది. తాజా బేకరీ పదార్థాలు, సలాడ్లు, శాండ్‌విచ్‌లు వంటి గ్రాబ్-అండ్-గో ఆప్షన్లు Dh5–Dh20 మధ్య లభిస్తాయి. హాట్ లంచ్ ధర Dh15 వరకు ఉంటుంది.

పిల్లలు పెద్దవారవుతున్న కొద్దీ భోజన ఎంపికల్లోనూ స్వేచ్ఛ పెరుగుతోందని పాఠశాలలు చెబుతున్నాయి. ప్రైమరీ విద్యార్థుల కోసం తల్లిదండ్రులు ముందుగానే భోజనం బుక్ చేస్తుండగా, సెకండరీ విద్యార్థులు తమకు నచ్చిన ఆహారాన్ని స్కూల్‌లోనే కొనుగోలు చేసుకునే అవకాశం ఉంటుంది.

దుబాయ్‌లోని స్విస్ ఇంటర్నేషనల్ సైంటిఫిక్ స్కూల్‌లో ఆరు వారాలకు ఒకసారి మారే అంతర్జాతీయ మెనూ అమల్లో ఉంది. ఇందులో స్టార్టర్, చెఫ్ స్పెషల్, ప్రధాన వంటకం, వెజిటేరియన్ లేదా వీగన్ ఆప్షన్, డెజర్ట్ ఉంటాయి. వెజిటేరియన్, వీగన్ ఆహారాలు ప్రతిరోజూ అందుబాటులో ఉంటాయి.

స్కూల్ భోజనాల నిర్వహణ కోసం పాఠశాలలు డిజిటల్ వ్యవస్థలను కూడా ఉపయోగిస్తున్నాయి. కొన్ని స్కూళ్లలో ప్రత్యేక యాప్‌ల ద్వారా తల్లిదండ్రులు భోజనాన్ని ముందుగా ఎంచుకుని చెల్లింపులు చేయవచ్చు.

అబుదాబిలోని బ్రిటిష్ ఇంటర్నేషనల్ స్కూల్‌లో తల్లిదండ్రులు Zenda యాప్ ద్వారా పిల్లల డిజిటల్ వాలెట్‌లో డబ్బు జమ చేసి క్యాష్‌లెస్‌గా భోజనానికి చెల్లించవచ్చు. స్కూల్‌లో నేరుగా కొనుగోలు చేసే సమయంలో విద్యార్థులు స్టూడెంట్ వాలెట్, కార్డు లేదా నగదును ఉపయోగించవచ్చు.

ఇక దుబాయ్‌లోని స్విస్ ఇంటర్నేషనల్ సైంటిఫిక్ స్కూల్‌లో Spare యాప్ ద్వారా ప్రతి విద్యార్థికి ప్రత్యేక ఖాతాను నిర్వహిస్తూ, తల్లిదండ్రులు భోజనం ఎంపిక చేసి చెల్లింపులు చేస్తున్నారు.

పిల్లల ఆహార అలర్జీలు, ప్రత్యేక ఆహార అవసరాల వివరాలను ముందుగానే పాఠశాలకు తెలియజేయాలని స్కూళ్లు సూచిస్తున్నాయి. దీంతో పిల్లల ఆరోగ్య అవసరాలకు అనుగుణంగా భోజనాన్ని అందించే అవకాశం ఉంటుందని చెబుతున్నాయి.