జెడ్డా: సౌదీ అరేబియాలో మంగళవారం పలు ప్రాంతాల్లో ఉరుములు, పిడుగులతో కూడిన వర్షాలు, వడగళ్ల వాన కురిసే అవకాశం ఉందని జాతీయ వాతావరణ కేంద్రం (NCM) తెలిపింది. కొన్ని ప్రాంతాల్లో ఉష్ణోగ్రతలు 46 డిగ్రీల సెల్సియస్‌ వరకు పెరగవచ్చని పేర్కొంది.

NCM వర్ష సూచన ప్రకారం.. జజాన్, అసీర్, అల్-బహా ప్రాంతాల్లో మోస్తరు నుంచి భారీ వర్షాలు ఉరుములు, పిడుగులు, వడగళ్లతో పాటు బలమైన గాలులతో కురిసే అవకాశం ఉంది. ఈ ప్రభావం మక్కా, మదీనా ప్రాంతాల్లోని ఎత్తైన ప్రాంతాలకు కూడా విస్తరించవచ్చని తెలిపింది.

తూర్పు ప్రావిన్స్‌లో అధిక ఉష్ణోగ్రతలు కొనసాగుతాయని, మధ్య, దక్షిణ ప్రాంతాలతో పాటు నజ్రాన్‌లోని కొన్ని ప్రాంతాల్లో బలమైన గాలుల కారణంగా దుమ్ము, ధూళి ఎగిసిపడే అవకాశం ఉందని వాతావరణ కేంద్రం హెచ్చరించింది.

సౌదీలోని పలు ప్రాంతాల్లో ఒకవైపు తీవ్ర వేడి, మరోవైపు ఉరుములు, పిడుగులు, వడగళ్లతో కూడిన వర్షాల పరిస్థితులు నెలకొనే అవకాశం ఉన్నందున ప్రజలు అప్రమత్తంగా ఉండాలని వాతావరణ అధికారులు సూచించారు.