మనామా: కారులో పెర్ఫ్యూమ్ బాటిల్‌ను ఉంచుకునే అలవాటు ఉన్న వాహనదారులు వేసవిలో జాగ్రత్తగా ఉండాలని బహ్రెయిన్ అంతర్గత వ్యవహారాల మంత్రిత్వ శాఖ హెచ్చరించింది. ముఖ్యంగా డ్యాష్‌బోర్డ్‌పై గాజు పెర్ఫ్యూమ్ బాటిళ్లను ఉంచడం ప్రమాదకరమని కల్నల్ ఒసామా బహర్ సూచించారు. బయట ఉష్ణోగ్రత 35 డిగ్రీల సెల్సియస్ ఉన్న సమయంలో కారును నేరుగా ఎండలో పార్క్ చేస్తే, కేవలం 15–30 నిమిషాల్లోనే కారు లోపలి ఉష్ణోగ్రత మరో 15 డిగ్రీలు పెరిగి సుమారు 50 డిగ్రీలకు చేరుకోవచ్చని హెచ్చరించారు.

అరగంట నుంచి గంట వ్యవధిలో ఉష్ణోగ్రత మరో 20 డిగ్రీలు పెరిగే అవకాశం ఉండటంతో, బయట 35 డిగ్రీలు ఉన్నప్పటికీ కారు లోపల 70 డిగ్రీల వరకు ఉష్ణోగ్రత నమోదయ్యే పరిస్థితి ఏర్పడొచ్చు. బహ్రెయిన్‌లో వేసవిలో బయట ఉష్ణోగ్రత 40–45 డిగ్రీలకు చేరినప్పుడు పరిస్థితి మరింత తీవ్రమవుతుందన్నారు. కారు రంగు కూడా వేడిపై ప్రభావం చూపుతుంది. ముదురు రంగు కార్లు ఎక్కువ సూర్యరశ్మిని గ్రహిస్తాయి. సీట్ల రంగు, అవి తయారైన మెటీరియల్‌—క్లాత్ లేదా లెదర్—కూడా లోపలి ఉష్ణోగ్రతను ప్రభావితం చేస్తాయి.

పెర్ఫ్యూమ్ బాటిల్ ఎందుకు ప్రమాదకరం?

గాజు పెర్ఫ్యూమ్ బాటిల్ లెన్స్‌ (Convex Lens) లాగా పనిచేయగలదు. సూర్యకాంతిని ఒక చిన్న ప్రాంతంలో కేంద్రీకరించడం వల్ల అక్కడ తీవ్రమైన వేడి ఏర్పడవచ్చు. సమీపంలో మండే పదార్థం ఉంటే అది మంటలు అంటుకునే ప్రమాదాన్ని పెంచుతుంది. తీవ్రమైన ఎండ, కారులో అధిక ఉష్ణోగ్రతలు, మండే పదార్థాలు—ఇవన్నీ ఒకే చోట ఉండటం ప్రమాదాన్ని మరింత పెంచుతాయి. అందుకే వేసవిలో పెర్ఫ్యూమ్ బాటిళ్లు లేదా ఇతర గాజు వస్తువులను కారులో, ముఖ్యంగా డ్యాష్‌బోర్డ్‌పై ఉంచవద్దని అధికారులు సూచిస్తున్నారు.
విండ్‌షీల్డ్‌కు సన్‌షేడ్ ఉపయోగించడం ద్వారా నేరుగా సూర్యకాంతి కారులోకి ప్రవేశించకుండా అడ్డుకోవచ్చు. దీంతో కారు లోపల వేడి పెరగడాన్ని కూడా కొంతవరకు తగ్గించవచ్చు. ఇక అధిక ఉష్ణోగ్రతల కారణంగా పెర్ఫ్యూమ్ నాణ్యత కూడా దెబ్బతినొచ్చు. ఎక్కువసేపు తీవ్రమైన వేడిలో ఉంచిన పెర్ఫ్యూమ్‌ వాసన మారిపోయే అవకాశం ఉంది. అందువల్ల భద్రతతో పాటు పెర్ఫ్యూమ్ నాణ్యతను కాపాడుకోవాలన్నా దాన్ని కారులో ఉంచకపోవడమే మంచిదని నిపుణులు చెబుతున్నారు.