రియాద్: సౌదీ అరేబియాలో సోషల్ మీడియా వినియోగంలో వాట్సాప్ అగ్రస్థానంలో కొనసాగుతోంది. దేశంలో 94.4 శాతం మంది పురుషులు, 90.4 శాతం మంది మహిళలు వాట్సాప్‌ను వినియోగిస్తున్నట్లు ‘సౌదీ ఇంటర్నెట్ 2025’ నివేదిక వెల్లడించింది. కమ్యూనికేషన్స్ అండ్ స్పేస్ టెక్నాలజీ కమిషన్ విడుదల చేసిన ఈ నివేదికలో సౌదీలో అత్యధికంగా ఉపయోగిస్తున్న సోషల్ మీడియా యాప్‌లతో పాటు మేల్, ఫీమేల్ మధ్య ఉన్న వినియోగ ధోరణులను వివరించారు.

మహిళల్లో స్నాప్‌చాట్‌కు ఆదరణ

వాట్సాప్ తర్వాత స్నాప్‌చాట్ రెండో స్థానంలో నిలిచింది. మహిళల్లో 88.2 శాతం, పురుషుల్లో 80.2 శాతం మంది స్నాప్‌చాట్‌ను ఉపయోగిస్తున్నారు. దీంతో వాట్సాప్ తర్వాత సౌదీ మహిళల్లో అత్యంత ప్రజాదరణ పొందిన యాప్‌గా స్నాప్‌చాట్ నిలిచింది. టిక్‌టాక్ వినియోగం మహిళల్లో 77.6 శాతం, పురుషుల్లో 76.5 శాతంగా ఉంది. యూట్యూబ్ వినియోగం పురుషుల్లో 81.1 శాతం, మహిళల్లో 68.8 శాతంగా నమోదైంది. ఇన్‌స్టాగ్రామ్ ఐదో స్థానంలో ఉండగా.. మహిళల్లో 42.4 శాతం, పురుషుల్లో 39.5 శాతం మంది వినియోగిస్తున్నారు.

ఈ గణాంకాలు సౌదీలో మెసేజింగ్, షార్ట్‌ఫార్మ్ వీడియో యాప్‌లకు ఉన్న ఆదరణను స్పష్టం చేస్తున్నాయి. అదే సమయంలో పురుషులు, మహిళల మధ్య కొన్ని ప్లాట్‌ఫామ్‌ల వినియోగంలో స్పష్టమైన తేడాలు కనిపిస్తున్నాయి.

సౌదీలో ఇంటర్నెట్ వినియోగం కూడా భారీగా పెరిగింది. 61.3 శాతం మంది ఇంటర్నెట్ వినియోగదారులు రోజుకు 7 గంటలు లేదా అంతకంటే ఎక్కువ సమయం ఆన్‌లైన్‌లో గడుపుతున్నట్లు నివేదిక తెలిపింది. మరో 34.1 శాతం మంది రోజుకు 3 నుంచి 6 గంటల వరకు ఇంటర్నెట్‌ను ఉపయోగిస్తున్నారు. 4.6 శాతం మంది మాత్రం రోజుకు మూడు గంటల కంటే తక్కువ సమయం ఆన్‌లైన్‌లో ఉంటున్నారు. రాత్రి 9 గంటల నుంచి 11 గంటల మధ్య సౌదీలో ఇంటర్నెట్ వినియోగం అత్యధికంగా ఉంటోంది. వారంలో శుక్రవారం అత్యంత యాక్టివ్ రోజుగా, ఏడాదిలో మార్చి నెల అత్యధిక ఇంటర్నెట్ వినియోగం నమోదైన నెలగా నిలిచింది.

ప్రయాణంలోనే ఎక్కువ ఇంటర్నెట్ వినియోగం

ఇంటర్నెట్ వినియోగించే ప్రదేశాలను పరిశీలిస్తే ప్రయాణంలో ఉన్నప్పుడు 84 శాతం వినియోగంతో మొదటి స్థానంలో ఉంది. ఆ తర్వాత ఇళ్లలో 77.5 శాతం, కార్యాలయాల్లో 41.4 శాతం వినియోగం నమోదైంది. ఇంటర్నెట్‌కు కనెక్ట్ అయ్యేందుకు మొబైల్ ఫోన్లే ప్రధాన సాధనంగా కొనసాగుతున్నాయి. ఏకంగా 99.6 శాతం మంది మొబైల్ ఫోన్ల ద్వారా ఇంటర్నెట్‌ను యాక్సెస్ చేస్తున్నారు. కంప్యూటర్ల వినియోగం 47.4 శాతం, టాబ్లెట్ల వినియోగం 39.2 శాతంగా ఉంది. స్మార్ట్‌వాచ్‌లు, గేమింగ్ కన్సోళ్లు వంటి ఇతర పరికరాల ద్వారా ఇంటర్నెట్ వినియోగం 30.7 శాతంగా నమోదైంది.

సౌదీలో అత్యధికంగా సందర్శించిన వెబ్‌సైట్లు

నివేదిక ప్రకారం సౌదీలో అత్యధికంగా సందర్శించిన వెబ్‌సైట్‌గా వికీపీడియా నిలిచింది. ఆ తర్వాత యూట్యూబ్, ఇన్‌స్టాగ్రామ్, విద్యా మంత్రిత్వ శాఖ వెబ్‌సైట్, వాట్సాప్, అబ్షర్, చాట్‌జీపీటీ ఉన్నాయి. ఇక సౌదీలో ఇంటర్నెట్‌లో అత్యధికంగా సెర్చ్ చేసిన పదాల్లో ‘Translator’ మొదటి స్థానంలో ఉంది. ఆ తర్వాత Absher, Noor, Translation, YouTube, Google, Madrasati, Saudi Riyal వంటి పదాలు ఉన్నాయి.

మొత్తంగా ఈ గణాంకాలు సౌదీ ప్రజల రోజువారీ జీవితంలో డిజిటల్ సేవలు, సోషల్ మీడియా, మొబైల్ ఇంటర్నెట్ వినియోగం ఎంతగా భాగమయ్యాయో వెల్లడిస్తున్నాయి.