జెడ్డా: సౌదీ అరేబియాలో పలు ప్రాంతాల్లో ఉరుములతో కూడిన భారీ వర్షాలు కురిసే అవకాశం ఉందని నేషనల్ సెంటర్ ఫర్ మెటీరియాలజీ (NCM) వెల్లడించింది. మరోవైపు కొన్ని ప్రాంతాల్లో ఉష్ణోగ్రతలు 48 డిగ్రీల సెల్సియస్ వరకు చేరనున్నట్లు తెలిపింది. జజాన్, అసీర్, అల్-బాహా, మక్కా ప్రాంతాల్లో మోస్తరు నుంచి భారీ ఉరుములతో కూడిన వర్షాలు కురిసే అవకాశం ఉంది. ఈ వర్షాల కారణంగా ఆకస్మిక వరదలు సంభవించే అవకాశం ఉందని NCM హెచ్చరించింది. 
అలాగే నజ్రాన్, రియాద్, ఖాసిమ్, మదీనా ప్రాంతాలతో పాటు ఈశాన్య ప్రాంతాల్లోని కొన్ని చోట్ల కూడా వర్షాన్ని కురిపించే ఉరుములతో కూడిన మేఘాలు ఏర్పడే అవకాశం ఉందని వాతావరణ శాఖ పేర్కొంది. తూర్పు ప్రావిన్స్‌లోని కొన్ని ప్రాంతాల్లో వాతావరణం వేడిగా నుంచి అత్యంత వేడిగా ఉంటుందని అంచనా వేసింది.

48 డిగ్రీలకు ఉష్ణోగ్రత
ఆదివారం అత్యధికంగా దమ్మామ్‌లో 48°C ఉష్ణోగ్రత నమోదయ్యే అవకాశం ఉంది. ఆ తర్వాత రియాద్‌లో 46°C, మదీనా, బురైదాలో 45°C, మక్కాలో 44°C వరకు ఉష్ణోగ్రతలు నమోదవుతాయని NCM తెలిపింది.
పలు నగరాల్లో దుమ్ము, బలమైన గాలులు
మక్కా, మదీనా, జెడ్డా నగరాల్లో ఆకాశం పాక్షికంగా మేఘావృతమై ఉండటంతో పాటు బలమైన గాలులు వీచే అవకాశం ఉంది. మక్కా, జెడ్డాలో గాలిలో దుమ్ము నిలిచే పరిస్థితులు కూడా ఏర్పడవచ్చని వాతావరణ శాఖ తెలిపింది. రియాద్, హైల్‌లో పాక్షికంగా మేఘావృత వాతావరణంతో పాటు బలమైన గాలులు వీస్తాయి. బురైదాలో బలమైన గాలులతో పాటు దుమ్ము ఎగిసే అవకాశం ఉంది. అభా, అల్-బాహా, జజాన్ ప్రాంతాల్లో ఉరుములతో కూడిన వర్షాలు, బలమైన గాలులు వీచే అవకాశం ఉంది. జజాన్‌లో ఇసుక, దుమ్ము ఎగిసే పరిస్థితులు కూడా ఉండవచ్చు. ఇక అరార్, సకాకాలో బలమైన గాలులు, దుమ్ము వీస్తాయని, టబూక్‌లో బలమైన గాలులు వీచే అవకాశం ఉందని NCM తెలిపింది. నజ్రాన్‌లో పాక్షికంగా మేఘావృత వాతావరణం ఉండొచ్చని, దమ్మామ్‌లో ఆకాశం నిర్మలంగా ఉంటుందని అంచనా వేసింది.

జెడ్డాలో 80 శాతం తేమ
ఆదివారం అత్యధికంగా జెడ్డా, అభాలో 80 శాతం తేమ నమోదయ్యే అవకాశం ఉంది. దమ్మామ్, అల్-బాహా, జజాన్‌లో 75 శాతం వరకు తేమ ఉండొచ్చని తెలిపింది. టబూక్, నజ్రాన్‌లో 50 శాతం, మక్కా, సకాకాలో 35 శాతం, అరార్‌లో 30 శాతం తేమ ఉండే అవకాశం ఉంది. రియాద్, మదీనా, బురైదా, హైల్‌లో తేమ స్థాయి సుమారు 20 శాతంగా ఉండొచ్చని NCM పేర్కొంది.