దుబాయ్: అత్యవసర పరిస్థితుల్లో ఒక్కో సెకను ఎంతో కీలకం. నిజమైన అత్యవసర పరిస్థితుల్లో ఉన్న వారికి పోలీసుల సహాయం వేగంగా అందేలా.. అత్యవసర నంబర్లను సరైన విధంగా వినియోగించాలని దుబాయ్ పోలీసులు ప్రజలకు సూచించారు.

సెప్టెంబర్ 9న యూఏఈ ఎమర్జెన్సీ నంబర్ డే సందర్భంగా ‘Every Second Makes a Difference’ అనే నినాదంతో అవగాహన కార్యక్రమాన్ని నిర్వహిస్తున్నారు. యూఏఈ అంతర్గత వ్యవహారాల మంత్రిత్వ శాఖ, దుబాయ్ పోలీసులు, ఇతర పోలీసు విభాగాల సహకారంతో ఈ కార్యక్రమం కొనసాగుతోంది.

999కు ఎలాంటి సందర్భాల్లో ఫోన్ చేయాలి?

999 అనేది పోలీసుల అత్యవసర నంబర్. ప్రాణాలకు, భద్రతకు లేదా ఆస్తులకు తక్షణ ప్రమాదం ఉన్నప్పుడు మాత్రమే ఈ నంబర్‌కు కాల్ చేయాలని అధికారులు సూచించారు.
అత్యవసర కాల్ చేసే సమయంలో ప్రశాంతంగా ఉండి.. ఘటన జరిగిన ప్రదేశం, ఏం జరిగింది, అవసరమైన ఇతర వివరాలను స్పష్టంగా చెప్పాలని సూచించారు. తద్వారా పోలీసులు పరిస్థితిని అంచనా వేసి అవసరమైన సహాయాన్ని త్వరగా పంపించగలుగుతారు.

 75 శాతం అత్యవసరం కానివే..

దుబాయ్ పోలీసులు గతంలో వెల్లడించిన వివరాల ప్రకారం.. ఒక ఏడాదిలో 999కు వచ్చిన 5 మిలియన్లకు పైగా కాల్స్‌లో దాదాపు 75 శాతం అత్యవసరం కానివే ఉన్నాయి.
ఇలాంటి కాల్స్‌లో దారులు అడగడం, ట్రాఫిక్ జరిమానాల గురించి తెలుసుకోవడం, ఏ ఫార్మసీ తెరిచి ఉందో అడగడం, తలనొప్పికి సలహా కోరడం, షాపింగ్ మాల్స్‌కు వెళ్లే మార్గం తెలుసుకోవడం వంటి విషయాలు కూడా ఉన్నాయని పోలీసులు తెలిపారు.

‘నాతో కలిసి లంచ్ చేయండి’ అంటూ 999కు కాల్

దుబాయ్ పోలీసులకు గతంలో వచ్చిన ఓ కాల్ మరింత ఆసక్తికరంగా నిలిచింది. ఒంటరిగా ఉన్న ఓ వృద్ధుడు తనతో కలిసి లంచ్ చేయడానికి పోలీసులు రావాలని కోరుతూ 999కు ఫోన్ చేశాడు. ప్రతి కాల్‌ను ఆపరేటర్లు పరిశీలించి సహాయం అవసరమా లేదా అని నిర్ధారిస్తారు. అయితే అత్యవసరం కాని కాల్స్ ఎక్కువగా రావడం వల్ల ఎమర్జెన్సీ లైన్లపై ఒత్తిడి పెరిగి.. నిజంగా ప్రమాదంలో ఉన్న వారికి స్పందించడంలో ఆలస్యం జరిగే అవకాశం ఉందని అధికారులు హెచ్చరిస్తున్నారు.

901 నంబర్ దేనికి?

అత్యవసరం కాని పోలీసు సేవలు, సాధారణ విచారణలు, ఇతర నాన్-ఎమర్జెన్సీ పోలీసు సేవల కోసం 901 నంబర్‌ను ఉపయోగించాలని దుబాయ్ పోలీసులు సూచించారు.
అత్యవసర పరిస్థితుల్లో 999ను మాత్రమే ఉపయోగించి.. ఇతర సాధారణ విషయాల కోసం 901ను వినియోగించడం ద్వారా అత్యవసర సేవలు అవసరమైన వారికి వేగంగా చేరేలా సహకరించాలని అధికారులు కోరారు.