కువైట్ సిటీ: కువైట్ ఫౌండేషన్ ఫర్ ది అడ్వాన్స్‌మెంట్ ఆఫ్ సైన్సెస్ (KFAS) ఆధ్వర్యంలో కువైట్ లైబ్రరీల అభివృద్ధి, పరిశోధన కార్యక్రమాలపై సమీక్ష జరిగింది. యునైటెడ్ కింగ్‌డమ్‌లో జరిగిన KFAS–ఆక్స్‌ఫర్డ్ సెంటర్ ఫర్ ఇస్లామిక్ స్టడీస్ (OCIS) స్టీరింగ్ కమిటీ సమావేశంలో పలు కీలక ప్రాజెక్టుల పురోగతిపై చర్చించారు. 

కువైట్ ఫౌండేషన్ విడుదల చేసిన ప్రకటన ప్రకారం.. సంయుక్త ప్రాజెక్టులు, కార్యక్రమాల పురోగతితో పాటు శాస్త్రీయ పరిశోధనకు మద్దతు, జ్ఞానాన్ని విస్తృతంగా అందుబాటులోకి తీసుకురావడం వంటి అంశాలను కమిటీ సమీక్షించింది. కువైట్ తరఫున KFAS బోర్డు సభ్యుడు షేక్ డాక్టర్ మిషాల్ జాబర్ అల్-అహ్మద్ అల్-సబాహ్ సమావేశానికి నాయకత్వం వహించారు. KFAS డైరెక్టర్ జనరల్ డాక్టర్ అమీనా ఫర్హాన్, స్టీరింగ్ కమిటీ సభ్యుడు డాక్టర్ సులేమాన్ అల్-అతీఖీ కూడా సమావేశంలో పాల్గొన్నారు.

ఆక్స్‌ఫర్డ్‌లో కువైట్ లైబ్రరీ

ఆక్స్‌ఫర్డ్ సెంటర్ ఫర్ ఇస్లామిక్ స్టడీస్‌లో ఏర్పాటు చేస్తున్న కువైట్ లైబ్రరీ తాజా పురోగతిని కమిటీ సమీక్షించింది. అలాగే కువైట్ పరిశోధకులకు జాతీయ ప్రాధాన్యత కలిగిన రంగాల్లో ఆక్స్‌ఫర్డ్‌లో పరిశోధనలు చేసేందుకు అవకాశం కల్పించే వార్షిక రీసెర్చ్ ఫెలోషిప్ ప్రోగ్రామ్పై కూడా చర్చించారు. అలాగే, OCIS సహకారంతో చేపడుతున్న కువైట్ నేషనల్ లైబ్రరీ ప్రాజెక్టు పురోగతిని కూడా సమావేశంలో సమీక్షించారు. ఈ ప్రాజెక్టు అభివృద్ధిలో OCISకు ఉన్న విద్యా, సాంకేతిక నైపుణ్యాలను ఎలా వినియోగించుకోవాలనే అంశంపై చర్చ జరిగింది. 

పరిశోధన, పరిరక్షణకు ప్రాధాన్యం

అంతర్జాతీయ శాస్త్రీయ, సాంస్కృతిక భాగస్వామ్యాలను బలోపేతం చేయడం, నాలెడ్జ్ మరియు నైపుణ్యాలను పరస్పరం పంచుకోవడం ద్వారా జాతీయ జ్ఞాన సంస్థలను అభివృద్ధి చేయడం KFAS లక్ష్యాల్లో భాగమని సంస్థ పేర్కొంది. అలాగే పరిశోధనా సామర్థ్యాన్ని పెంచడం, చారిత్రక జ్ఞాన వారసత్వాన్ని పరిరక్షించడం, పరిశోధకులు మరియు ఆసక్తి ఉన్న ప్రజలకు వాటిని అందుబాటులోకి తీసుకురావడంపై దృష్టి సారిస్తున్నట్లు తెలిపింది.