మస్కట్: ఒమన్‌లో అమల్లో ఉన్న విలువ ఆధారిత పన్ను (VAT) చట్టం ప్రకారం పలు వస్తువులు, సేవలకు VAT నుంచి మినహాయింపు ఉంది. రాయల్ డిక్రీ 121/2020 ద్వారా VAT చట్టం అమల్లోకి వచ్చింది. దీనికి సంబంధించిన ఎగ్జిక్యూటివ్ రెగ్యులేషన్‌ను ట్యాక్స్ అథారిటీ డెసిషన్ 53/2021 ద్వారా జారీ చేసింది. అనంతరం పలు నిబంధనల్లో మార్పులు చేశారు.

మహమ్మద్ ఇబ్రహీం లా ఫర్మ్ ఛైర్మన్ డాక్టర్ మహమ్మద్ ఇబ్రహీం అల్ జద్జాలీ ప్రకారం VAT మినహాయింపు పొందే ప్రధాన విభాగాలు ఇలా ఉన్నాయి.

ఆర్థిక సేవలు: రుణాలు, క్రెడిట్ సదుపాయాలు, డిపాజిట్లు, ఆర్థిక సాధనాలు, సెక్యూరిటీలు, లైఫ్ ఇన్సూరెన్స్ వంటి సేవలకు VAT మినహాయింపు ఉంటుంది. అయితే కస్టమర్ నుంచి ఫీజు, కమిషన్ లేదా వాణిజ్య డిస్కౌంట్ తీసుకునే ఆర్థిక సేవలు ఈ మినహాయింపులోకి రావు.

వైద్య సేవలు: లైసెన్స్ పొందిన వైద్య సంస్థలు అందించే ఆరోగ్య సేవలకు VAT మినహాయింపు ఉంటుంది. రోగులకు నేరుగా సంబంధించిన అంబులెన్స్ రవాణా, వసతి వంటి సేవలు కూడా ఇందులో ఉన్నాయి.

విద్యా సేవలు: లైసెన్స్ పొందిన విద్యా సంస్థలు అందించే విద్యా సేవలు VAT నుంచి మినహాయింపు పొందుతాయి. విద్యార్థులకు సంబంధించిన రవాణా, భోజనం, వసతి వంటి సేవలు కూడా మినహాయింపులో ఉన్నాయి. అయితే ఆమోదిత పాఠ్యాంశంలో లేని కోర్సులకు VAT వర్తిస్తుంది.

ప్రజా రవాణా: షెడ్యూల్ ప్రకారం నడిచే ప్రజా రవాణా, పబ్లిక్ ట్యాక్సీలకు VAT మినహాయింపు ఉంది. అయితే ప్రత్యేక కంపెనీలు నిర్వహించే ట్యాక్సీలు దీనికి మినహాయింపు కావు.

నివాస గృహాలు: ఒమన్ అద్దె చట్టాలకు అనుగుణమైన లీజ్ ఒప్పందం కింద కనీసం 3 నెలల పాటు నిరంతరంగా అద్దెకు ఇచ్చే నివాస ఆస్తులకు VAT మినహాయింపు ఉంటుంది.

భూమి, నివాస ఆస్తులు: నిర్మాణం, నిర్మాణంలోని భాగం ఏదీ లేని అభివృద్ధి చేయని భూమికి VAT మినహాయింపు ఉంటుంది. ఇప్పటికే ఉన్న నివాస ఆస్తిని తిరిగి విక్రయించడంపైనా VAT ఉండదు. అయితే నివాస ఆస్తి మొదటి విక్రయం, హోటళ్లు, టూరిస్ట్ కాంప్లెక్సులు, వాణిజ్య భవనాల విక్రయాలు VAT పరిధిలోనే ఉంటాయి.

దిగుమతి వస్తువులకు మినహాయింపులు

దిగుమతుల విషయంలో కూడా కొన్ని వస్తువులకు VAT మినహాయింపు ఉంటుంది. వాటిలో..

* పరస్పర ప్రాతిపదికన దౌత్య కార్యాలయాలు, అంతర్జాతీయ సంస్థలకు సంబంధించిన వస్తువులు

* సాయుధ దళాలు, అంతర్గత భద్రతా దళాల కోసం అవసరమైన వస్తువులు

* మందుగుండు సామగ్రి, ఆయుధాలు, సైనిక సామగ్రి, సైనిక రవాణా వాహనాలు, వాటి విడిభాగాలు

* లాభాపేక్షలేని స్వచ్ఛంద సంస్థలకు సరఫరా చేసే వస్తువులు

* తిరిగి దిగుమతి చేసే వస్తువులు

* విదేశాల్లో నివసిస్తున్న ఒమన్ పౌరుల వ్యక్తిగత వస్తువులు, ఉపయోగించిన గృహోపకరణాలు

* తొలిసారిగా ఒమన్‌కు వచ్చే విదేశీయుల వ్యక్తిగత వస్తువులు, ఉపయోగించిన గృహోపకరణాలు

* ప్రయాణికుల వ్యక్తిగత సామాను, బహుమతులు వ్యక్తిగత వినియోగానికి సంబంధించినవిగా, వాణిజ్య ప్రయోజనం లేనివిగా ఉండి, నిబంధనల్లో పేర్కొన్న విలువ పరిమితి, ఇతర షరతులకు లోబడి ఉంటే VAT మినహాయింపు పొందుతాయి.

అదేవిధంగా GCC వెలుపలి దేశాల నుంచి దిగుమతి చేసే వికలాంగుల సహాయక పరికరాలకు కూడా కొన్ని షరతులతో VAT మినహాయింపు ఉంది. లైసెన్స్ పొందిన సంఘాలు, ప్రభుత్వ సంస్థలు లేదా అధికారిక డిసెబిలిటీ కార్డు కలిగిన GCC పౌరులు వ్యక్తిగత వినియోగం కోసం దిగుమతి చేసుకునే పరికరాలకు ఈ మినహాయింపు వర్తిస్తుంది.

గమనిక: VAT మినహాయింపులు నిర్దిష్ట షరతులకు లోబడి ఉంటాయి. కాబట్టి ఏదైనా లావాదేవీకి VAT వర్తిస్తుందా లేదా అన్నది సంబంధిత ఎగ్జిక్యూటివ్ రెగ్యులేషన్ నిబంధనల ఆధారంగా నిర్ధారించుకోవాలని నిపుణులు సూచిస్తున్నారు.