షార్జా: యూఏఈలోని షార్జాలో విషాద ఘటన చోటుచేసుకుంది. కేరళకు చెందిన 32 ఏళ్ల భారతీయ మహిళ, ఇద్దరు చిన్నారుల తల్లి అయిన అఫీనా బషీర్ ఇంట్లో అకస్మాత్తుగా కుప్పకూలి మృతి చెందారు. ఆమెకు ఎలాంటి అనారోగ్య లక్షణాలు కనిపించలేదని కుటుంబ సభ్యులు తెలిపారు. అఫీనా బషీర్ వృత్తిరీత్యా డెంటిస్ట్. భర్త యాసర్, ఇద్దరు చిన్నారులతో కలిసి గత నాలుగేళ్లుగా షార్జాలో నివసిస్తున్నారు. పిల్లల సంరక్షణ కోసం కొంతకాలంగా ఆమె ఉద్యోగానికి విరామం తీసుకుని ఇంట్లోనే ఉంటున్నారు.

ఆమె పిల్లల వయసు సుమారు మూడున్నరేళ్లు, ఏడాదిన్నర ఉంటుందని తెలిపారు. “ఆమె పూర్తిగా ఆరోగ్యంగా ఉన్నారు. అనారోగ్యంగా ఉన్నట్లు ఎలాంటి సంకేతాలు కనిపించలేదు. ఇంట్లో ఉన్న సమయంలో అకస్మాత్తుగా కుప్పకూలిపోయారు. ప్రాథమిక నివేదిక ప్రకారం ఆమె అక్కడికక్కడే మృతి చెందారు. అసలు కారణం ఇంకా తెలియాల్సి ఉంది” అని ఆమె భర్త యాసర్ తెలిపారు.

అఫీనా కుటుంబం వేసవి సెలవుల కోసం భారత్‌కు వెళ్లి ఇటీవలే షార్జాకు తిరిగి వచ్చింది. ఆగస్టు 19న కుటుంబం భారత్ నుంచి తిరిగి వచ్చినట్లు భర్త తెలిపారు.ప్రస్తుతం చిన్నారుల సంరక్షణ కోసం యాసర్ సోదరి కుటుంబంతో కలిసి ఉంటున్నారు. అఫీనా తల్లిదండ్రులు, ఇద్దరు సోదరీమణులు భారత్‌లో ఉన్నారని కుటుంబ సభ్యులు తెలిపారు. అవసరమైన అధికారిక ప్రక్రియలు పూర్తయ్యాక అఫీనా మృతదేహాన్ని కేరళలోని మలప్పురంలో ఉన్న స్వస్థలానికి తరలించేందుకు కుటుంబ సభ్యులు ఏర్పాట్లు చేస్తున్నారు.

యువతలో అకస్మిక మరణాలపై ఆందోళన

ఇటీవలి కాలంలో ఆరోగ్యంగా కనిపించే యువత అకస్మాత్తుగా కుప్పకూలి మృతి చెందుతున్న ఘటనలు ఆందోళన కలిగిస్తున్నాయి. యూఏఈలో గతంలో కూడా క్రీడలు ఆడుతూ కొందరు భారతీయ ప్రవాసులు అకస్మాత్తుగా కుప్పకూలి ప్రాణాలు కోల్పోయిన ఘటనలు నమోదయ్యాయి. వైద్య నిపుణుల ప్రకారం, కొంతమందిలో ముందుగా గుర్తించబడని గుండె సంబంధిత సమస్యలు లేదా పుట్టుకతో ఉన్న గుండె లోపాలు అకస్మిక మరణాలకు కారణం కావచ్చు. అయితే అఫీనా బషీర్ మరణానికి కారణం ఏమిటనేది అధికారికంగా నిర్ధారించాల్సి ఉంది.