దుబాయ్: సెప్టెంబర్ 30న దుబాయ్-టెల్ అవీవ్ ఫ్లై దుబాయ్ FZ1073 విమానంలో జరిగిన ఘర్షణలో గాయపడిన భారతీయ పైలట్ కెప్టెన్ స్మిత్ మచ్చర్ ప్రస్తుతం యూఏఈలోని ఆసుపత్రిలో చికిత్స పొందుతూ కోలుకుంటున్నారని యూఏఈలోని భారత రాయబార కార్యాలయం తెలిపింది.

అక్టోబర్ 1న భారత రాయబారి దీపక్ మిట్టల్ ఆసుపత్రికి వెళ్లి కెప్టెన్ స్మిత్ మచ్చర్, ఆయన కుటుంబ సభ్యులను పరామర్శించారు. పైలట్ ఆరోగ్య పరిస్థితి స్థిరంగా ఉందని, ఆయన ధైర్యంగా ఉన్నారని రాయబారి తెలిపారు. కెప్టెన్ స్మిత్‌తో మాట్లాడిన సమయంలో ఆయన సాధారణంగానే మాట్లాడటంతో పాటు నవ్వుతూ కనిపించారని దీపక్ మిట్టల్ పేర్కొన్నారు. ఇది తమకు, ముఖ్యంగా ఆయన కుటుంబ సభ్యులకు ఎంతో ఉపశమనం కలిగించిందని తెలిపారు.

యూఏఈలో మెరుగైన వైద్యం

కెప్టెన్ స్మిత్‌కు యూఏఈలో మంచి వైద్యం అందుతోందని, భారత రాయబార కార్యాలయం యూఏఈ అధికారులతో నిరంతరం సంప్రదింపులు కొనసాగిస్తోందని రాయబారి వెల్లడించారు. దుబాయ్‌లో స్మిత్ భార్య, సోదరుడు, ఇతర కుటుంబ సభ్యులను కూడా కలిశానని దీపక్ మిట్టల్ తెలిపారు. కెప్టెన్ ఆరోగ్యం, సంక్షేమం కోసం భారత ప్రభుత్వం పూర్తి సహకారం అందిస్తుందని కుటుంబానికి హామీ ఇచ్చినట్లు చెప్పారు.

టబుక్ నుంచి అబుదాబికి తరలింపు

భారత విదేశాంగ మంత్రిత్వ శాఖ కూడా కెప్టెన్ స్మిత్ ఆరోగ్య పరిస్థితిని నిశితంగా పర్యవేక్షిస్తున్నట్లు తెలిపింది. ఘటన అనంతరం తొలుత సౌదీ అరేబియాలోని టబుక్ ఆసుపత్రిలో చికిత్స పొందిన ఆయనను అనంతరం మరింత వైద్యం, కోలుకునే ప్రక్రియ కోసం అబుదాబికి తరలించినట్లు విదేశాంగ మంత్రిత్వ శాఖ వెల్లడించింది. భారత రాయబార కార్యాలయం, దుబాయ్‌లోని భారత కాన్సులేట్ స్థానిక యూఏఈ అధికారులతో నిరంతరం సంప్రదింపులు జరుపుతున్నాయని తెలిపింది.

13 ఏళ్లకు పైగా విమానయాన అనుభవం

కెప్టెన్ స్మిత్ మచ్చర్‌కు 13 ఏళ్లకు పైగా వాణిజ్య విమానయాన అనుభవం ఉంది. బోయింగ్ 737 విమానాల్లో ఆయనకు విస్తృత అనుభవం ఉండటంతో పాటు లైన్ ట్రైనింగ్ కెప్టెన్‌గా కూడా సేవలందించారు. ఆయనకు సుమారు 9,750 విమాన ప్రయాణ గంటల అనుభవం ఉన్నట్లు సమాచారం.

ఘటనపై దర్యాప్తు

ఇదిలా ఉండగా.. విమానంలో జరిగిన ఘటనపై యూఏఈ అధికారులు దర్యాప్తు కొనసాగిస్తున్నారు. ఈ ఘటనకు ఉగ్రవాద కార్యకలాపాలు లేదా ఉద్దేశంతో సంబంధం ఉందా, ముందస్తు ప్రణాళిక లేదా ఎవరి ఆదేశాలైనా ఉన్నాయా అనే కోణంలో దర్యాప్తు చేస్తున్నట్లు యూఏఈ అటార్నీ జనరల్ తెలిపారు. ఈ ఘటనపై ప్రత్యేక పబ్లిక్ ప్రాసిక్యూషన్ దర్యాప్తు బృందాన్ని ఏర్పాటు చేయాలని కౌన్సిలర్ డాక్టర్ హమద్ సైఫ్ అల్ షమ్సీ ఆదేశించారు.