మస్కట్: ఒమన్ సమీపంలోని స్ట్రెయిట్ ఆఫ్ హోర్ముజ్లో పనామా జెండాతో ప్రయాణిస్తున్న వాణిజ్య నౌక MT On Peaceపై దాడి జరిగినట్లు భారత విదేశాంగ మంత్రిత్వ శాఖ తెలిపింది. ఈ ఘటనలో మొత్తం 12 మంది సిబ్బంది గాయపడగా, వారిలో 11 మంది భారతీయులని వెల్లడించింది.

నౌకలో మొత్తం 19 మంది సిబ్బంది ఉండగా, వారిలో 17 మంది భారతీయులు ఉన్నట్లు భారత విదేశాంగ శాఖ పేర్కొంది.

ఒమన్ అధికారుల సహకారంతో గాయపడిన సిబ్బందిని నౌక నుంచి తరలించి, ఒమన్‌లోని ఖసబ్లో వైద్య చికిత్స అందిస్తున్నట్లు విదేశాంగ శాఖ తెలిపింది. ఈ సందర్భంగా ఒమన్ అధికారులకు భారత ప్రభుత్వం కృతజ్ఞతలు తెలిపింది.

వాణిజ్య నౌకలపై వరుసగా జరుగుతున్న దాడుల పై భారత విదేశాంగ శాఖ తీవ్ర ఆందోళన వ్యక్తం చేసింది. వాణిజ్య నౌకలు, నావికులు, పౌర మౌలిక వసతులను లక్ష్యంగా చేసుకునే దాడులు తక్షణమే నిలిపివేయాలని కోరింది.

అంతర్జాతీయ జలమార్గాల్లో నౌకాయానం, వాణిజ్య కార్యకలాపాలను వీలైనంత త్వరగా పునరుద్ధరించాల్సిన అవసరం ఉందని భారత విదేశాంగ శాఖ స్పష్టం చేసింది.