అబుదాబి: యూఏఈ రాజధాని అబుదాబిలోని అల్ ధఫ్రా ప్రాంతంలో ఓ వేర్ హౌజ్ లో చెలరేగిన అగ్నిప్రమాదాన్ని అగ్నిమాపక సిబ్బంది అదుపులోకి తీసుకొచ్చారు. ఈ ఘటనలో ఎలాంటి ప్రాణనష్టం జరగలేదని అబుదాబి పోలీసులు వెల్లడించారు. వేర్ హౌజ్లో మంటలు చెలరేగినట్లు సమాచారం అందడంతో అబుదాబి సివిల్ డిఫెన్స్ బృందాలు వెంటనే ఘటనా స్థలానికి చేరుకుని సహాయక చర్యలు చేపట్టాయి. తీవ్రంగా వ్యాపించిన మంటలను అదుపులోకి తీసుకొచ్చినట్టు అధికారులు తెలిపారు. కాగా, ప్రమాదానికి గల కారణాలు, ఆస్తి నష్టానికి సంబంధించిన వివరాలు వెల్లడించలేదు. ఈ ఘటనకు సంబంధించి ప్రజలు సరైన సమాచారం, తాజా వివరాల కోసం అధికారిక వనరులను మాత్రమే అనుసరించాలని అబుదాబి పోలీసులు సూచించారు.

ఇదిలా ఉండగా, సెప్టెంబర్ 30న అబుదాబిలోని అల్ వత్వా ప్రాంతంలో వ్యర్థాల సేకరణ కేంద్రం వద్ద అగ్నిప్రమాదం చోటుచేసుకుంది. ఆ ఘటనలోనూ అబుదాబి పోలీసులు, సివిల్ డిఫెన్స్ సిబ్బంది కలిసి మంటలను అదుపులోకి తీసుకొచ్చారు. అలాగే, సెప్టెంబర్ 3న అల్ మఫ్రాక్ పారిశ్రామిక ప్రాంతంలోని ఓ వేర్ హౌజ్ లో అగ్నిప్రమాదం జరగగా, అధికారులు సకాలంలో స్పందించి మంటలను అదుపులోకి తీసుకొచ్చారని తెలిపారు.