రియాద్‌: సౌదీ అరేబియాలో విమాన సర్వీసులకు తీవ్ర అంతరాయం ఏర్పడింది. యెమెన్‌కు చెందిన హూతీ తిరుగుబాటుదారులు సౌదీ విమానాశ్రయాలపై జరిపిన దాడుల నేపథ్యంలో పెద్ద సంఖ్యలో విమానాలను రద్దు చేశారు. అక్టోబర్‌ 8 నుంచి 14వ తేదీ మధ్య 3,100కు పైగా విమానాలు రద్దు కావడం లేదా నో-ఫ్లై జాబితాలోకి వెళ్లడం పరిస్థితి తీవ్రతకు అద్దం పడుతోంది. దీంతో సౌదీ అరేబియాకు వెళ్లాల్సిన, అక్కడి నుంచి ఇతర ప్రాంతాలకు ప్రయాణించాల్సిన ప్రయాణికులు తీవ్ర ఇబ్బందులు ఎదుర్కొంటున్నారు. విమానయాన విశ్లేషణ సంస్థ సిరియం గణాంకాల ప్రకారం.. అక్టోబర్‌ 14న సౌదీ అరేబియా నుంచి బయలుదేరాల్సిన 1,097 విమానాల్లో 313 విమానాలు ఇప్పటికే రద్దయ్యాయి. అంటే మొత్తం విమానాల్లో 28.53 శాతం ప్రభావితమయ్యాయి. రోజుకు దగ్గరపడే కొద్దీ ఈ సంఖ్య మరింత పెరిగే అవకాశం ఉందని అంచనా వేశారు. అక్టోబర్‌ 13న 1,058 విమానాలకు గాను 556 విమానాలు రద్దు కాగా, అక్టోబర్‌ 12న అత్యధికంగా 1,048 విమానాల్లో 632 సర్వీసులు నిలిచిపోయాయి. ఆ రోజు మొత్తం విమానాల్లో 60.31 శాతం ప్రభావితమయ్యాయి.

సౌదీ విమానయాన సంస్థలపై తీవ్ర ప్రభావం

విమానాల రద్దుతో సౌదీకి చెందిన ప్రధాన విమానయాన సంస్థలు తీవ్రంగా ప్రభావితమయ్యాయి. అక్టోబర్‌ 8 నుంచి 13వ తేదీ మధ్య సౌదియా సంస్థకు చెందిన 2,273 విమానాల్లో 1,091 రద్దయ్యాయి. ఫ్లైనాస్‌ సంస్థకు చెందిన 1,183 విమానాల్లో 564, ఫ్లైదీల్‌ సంస్థకు చెందిన 975 విమానాల్లో 496 విమానాలు రద్దు జాబితాలో చేరాయి. మరోవైపు రియాద్‌ ఎయిర్‌ సంస్థకు చెందిన 113 విమానాల్లో 80 రద్దయ్యాయి. దీంతో ఆ సంస్థ విమానాల్లో 70.80 శాతం సర్వీసులకు అంతరాయం ఏర్పడింది. సౌదీ అరేబియాలోని విమానాశ్రయాల్లో రియాద్‌లో ఉన్న కింగ్‌ ఖాలిద్‌ అంతర్జాతీయ విమానాశ్రయం అత్యధికంగా ప్రభావితమైంది. అక్టోబర్‌ 14న అక్కడి నుంచి బయలుదేరాల్సిన 334 విమానాల్లో 296 రద్దయ్యాయి లేదా నో-ఫ్లై జాబితాలోకి వెళ్లాయి. ఇది మొత్తం విమానాల్లో 88.62 శాతం.

దమ్మామ్‌లోని కింగ్‌ ఫహద్‌ అంతర్జాతీయ విమానాశ్రయంలో 114 విమానాల్లో 58, జెడ్డాలోని కింగ్‌ అబ్దులజీజ్‌ అంతర్జాతీయ విమానాశ్రయంలో 370 విమానాల్లో 105, మదీనాలోని ప్రిన్స్‌ మొహమ్మద్‌ బిన్‌ అబ్దులజీజ్‌ అంతర్జాతీయ విమానాశ్రయంలో 88 విమానాల్లో 19 సర్వీసులు ప్రభావితమయ్యాయి. ఇక అబ్హా, తబూక్‌, తాయిఫ్‌ వంటి చిన్న విమానాశ్రయాల్లోనూ పెద్ద సంఖ్యలో విమానాలు రద్దయ్యాయి. యాన్బు, నజ్రాన్‌, ఖైసుమా, హఫర్‌ అల్‌ బాతిన్‌, షరూరా, నియోమ్‌ బే, తురైఫ్‌, రఫా, వెజ్‌ విమానాశ్రయాల నుంచి షెడ్యూల్‌ చేసిన అన్ని బయలుదేరు విమానాలు రద్దయినట్లు గణాంకాలు వెల్లడిస్తున్నాయి.

వరుస దాడులతో భద్రతాపరమైన ఆందోళనలు

అమెరికా-ఇరాన్‌ యుద్ధం నేపథ్యంలో సౌదీ అరేబియాలోని విమానాశ్రయాలపై హూతీ తిరుగుబాటుదారుల దాడులు తీవ్ర ఆందోళన కలిగిస్తున్నాయి. అక్టోబర్‌ 8న రియాద్‌లోని కింగ్‌ ఖాలిద్‌ అంతర్జాతీయ విమానాశ్రయంపై జరిగిన దాడిలో ముగ్గురు సౌదీ పౌరులు మరణించగా, వారిలో సౌదియా విమాన కెప్టెన్‌ కూడా ఉన్నట్లు సౌదీ పౌర విమానయాన ప్రాధికార సంస్థ తెలిపింది. నేలపై ఉన్న సౌదియా విమానం కూడా దెబ్బతిన్నట్లు వెల్లడించింది. అదే రోజు సాయంత్రం విమానాశ్రయంలో కార్యకలాపాలు తిరిగి ప్రారంభమయ్యాయి. అక్టోబర్‌ 10న ప్రయాణికుల టెర్మినల్‌పై జరిగిన దాడిలో 12 మంది మరణించగా, 309 మంది గాయపడినట్లు అధికారులు వెల్లడించారు. వారంలోనే రియాద్‌ విమానాశ్రయంపై ఇది మూడో దాడిగా పేర్కొన్నారు. అక్టోబర్‌ 11న జరిగిన మరో దాడిలో పాకిస్థాన్‌కు చెందిన ఒక వ్యక్తి మరణించగా, మరో 11 మంది గాయపడ్డారు. ఈ పరిణామాల నేపథ్యంలో కింగ్‌ ఖాలిద్‌ విమానాశ్రయంలో కార్యకలాపాల నిలిపివేతను అధికారులు పొడిగించారు. విమానయాన నోటీసు (NOTAM) ప్రకారం అక్టోబర్‌ 17 వరకు విమానాశ్రయం మూసివేయనున్నారు.

అంతర్జాతీయ విమాన సర్వీసులపైనా ప్రభావం

సౌదీ అరేబియాలో నెలకొన్న పరిస్థితుల నేపథ్యంలో పలు అంతర్జాతీయ విమానయాన సంస్థలు తమ సర్వీసులను రద్దు చేశాయి. ఎతిహాద్‌ ఎయిర్‌వేస్‌ అబుదాబి-రియాద్‌ విమానాలను అక్టోబర్‌ 19 వరకు రద్దు చేసింది. జెడ్డా, దమ్మామ్‌ సర్వీసులను అక్టోబర్‌ 14 వరకు నిలిపివేసింది.ఫ్లైదుబాయ్‌ రియాద్‌, దమ్మామ్‌, అబ్హా విమానాలను అక్టోబర్‌ 19 వరకు రద్దు చేసింది. గల్ఫ్‌ ఎయిర్‌ రియాద్‌ సర్వీసులను అక్టోబర్‌ 17 వరకు నిలిపివేయగా, ఎయిర్‌ ఫ్రాన్స్‌ రియాద్‌ విమానాలను అక్టోబర్‌ 31 వరకు రద్దు చేసింది. విమానాల రద్దుతో సౌదీ అరేబియాకు వెళ్లే ప్రయాణికులు తమ ప్రయాణ ప్రణాళికలను మార్చుకోవాల్సిన పరిస్థితి ఏర్పడింది. ప్రయాణికులు విమానాశ్రయానికి బయలుదేరే ముందు సంబంధిత విమానయాన సంస్థల నుంచి తాజా సర్వీసుల వివరాలను తెలుసుకోవాలని సూచిస్తున్నారు.