అబుధాబి: చిన్నారిని రాత్రివేళ బీచ్‌లో ఒంటరిగా వదిలేయడం, ఆమె సోషల్ మీడియా వినియోగంపై సరైన పర్యవేక్షణ లేకపోవడంతో.. బాలికపై నిర్లక్ష్యానికి సంబంధించిన కేసులో యూఏఈ కోర్టు ఓ మహిళను దోషిగా నిర్ధారించింది. ఈ కేసులో శిక్షకు సంబంధించి ఫెడరల్ సుప్రీంకోర్టు కీలక నిర్ణయం తీసుకుంది. చిన్నారి నైతిక భద్రతను కాపాడేందుకు అవసరమైన చర్యలు తీసుకోవడంలో మహిళ విఫలమైందని ప్రాసిక్యూషన్ ఆరోపించింది. బాలిక సోషల్ మీడియా ప్లాట్‌ఫామ్‌ను దుర్వినియోగం చేయడంతో ఆమె ఫొటోలు ఇతరులకు చేరాయని కూడా పేర్కొంది.

 వాడీమా చట్టం కింద కేసు

చిన్నారికి అవసరమైన సంరక్షణ, పర్యవేక్షణ అందించడంలో విఫలమైనందుకు ఫెడరల్ లా నంబర్ 3 ఆఫ్ 2016 కింద మహిళపై కేసు నమోదు చేశారు. ఈ చట్టాన్ని ‘వాడీమా చట్టం(Wadeema’s Law)’గా పిలుస్తారు. ఇది పిల్లల హక్కులు, రక్షణకు సంబంధించిన చట్టమని.. తొలుత కేసును విచారించిన క్రిమినల్ కోర్టు మహిళను దోషిగా నిర్ధారించి, రెండు నెలల పాటు కమ్యూనిటీ సర్వీస్ చేయాలని, కోర్టు ఖర్చులు చెల్లించాలని ఆదేశించింది.

కమ్యూనిటీ సర్వీస్‌కు బదులుగా Dh3,000 జరిమానా

తొలి కోర్టు తీర్పును మహిళ అప్పీల్ చేయడంతో ఫెడరల్ అప్పీల్ కోర్టు శిక్షలో మార్పు చేసింది. రెండు నెలల కమ్యూనిటీ సర్వీస్‌ను రద్దు చేసి, దాని స్థానంలో Dh3,000 జరిమానా విధించింది. అనంతరం మహిళ తీర్పు అమలుపై అభ్యంతరం వ్యక్తం చేసినప్పటికీ, కోర్టు ఆ అభ్యంతరాన్ని విచారణకు స్వీకరించడానికి అనుమతించలేదు. ఖర్చులు చెల్లించాలని ఆదేశించింది. అయితే, అప్పీల్ కోర్టు శిక్షను మార్చిన విధానాన్ని అటార్నీ జనరల్ ఫెడరల్ సుప్రీంకోర్టులో సవాలు చేశారు.

శిక్షను పెంచే విధంగా మార్పు చేయరాదు

ఈ కేసును పరిశీలించిన ఫెడరల్ సుప్రీంకోర్టు.. అసలు తీర్పుపై మహిళ మాత్రమే అప్పీల్ చేసిందని, ప్రాసిక్యూషన్ అప్పీల్ చేయలేదని గుర్తించింది. క్రిమినల్ ప్రొసీజర్స్ చట్టంలోని ఆర్టికల్ 241 ప్రకారం, నిందితురాలు మాత్రమే అప్పీల్ చేసిన సందర్భంలో ఆమెకు వ్యతిరేకంగా, శిక్షను మరింత కఠినతరం చేసే విధంగా తీర్పును మార్చడం సాధ్యం కాదని కోర్టు వివరించింది.

ఈ కేసులో రెండు నెలల కమ్యూనిటీ సర్వీస్‌తో పోలిస్తే Dh3,000 జరిమానా మరింత కఠినమైన శిక్షగా పరిగణించవచ్చని న్యాయమూర్తులు అభిప్రాయపడ్డారు. దీంతో అప్పీల్ కోర్టు ఇచ్చిన తీర్పును ఫెడరల్ సుప్రీంకోర్టు రద్దు చేసి, శిక్షపై తిరిగి పరిశీలించి కొత్త నిర్ణయం తీసుకోవడానికి కేసును సంబంధిత కోర్టుకు వెనక్కి పంపించింది.