బహ్రెయిన్‌: కర్జకాన్ సముద్ర తీరాన్ని పర్యాటకులకు, స్థానిక నివాసితులకు మరింత ఆకర్షణీయంగా తీర్చిదిద్దేందుకు BD1.87 మిలియన్ల వ్యయంతో భారీ అభివృద్ధి ప్రాజెక్టును చేపట్టనున్నారు. అయితే, అదనపు నిధుల ఆమోదం కోసం ఎదురుచూస్తుండటంతో నిర్మాణ పనుల కాంట్రాక్టు ఇంకా ఖరారు కాలేదు. నార్తర్న్ మున్సిపల్ కౌన్సిల్ సభ్యురాలు జైనబ్ అల్ దురాజీ తెలిపిన వివరాల ప్రకారం.. ప్రాజెక్టుకు సంబంధించి టెండర్ల పరిశీలన పూర్తయింది. పనులను అల్ ముయ్యద్ కాంట్రాక్టింగ్ సంస్థకు అప్పగించేందుకు మున్సిపాలిటీస్ అఫైర్స్ అండ్ అగ్రికల్చర్ మంత్రిత్వ శాఖ అదనపు నిధుల ఆమోదం పొందే ప్రక్రియను కొనసాగిస్తోంది.

12,333 చదరపు మీటర్లలో ఆధునిక సౌకర్యాలు

ఈ ప్రాజెక్టును మొత్తం 12,333 చదరపు మీటర్ల విస్తీర్ణంలో అభివృద్ధి చేయనున్నారు. ఇందులో ఇసుకతో కూడిన బీచ్, సముద్ర తీరం వెంబడి నడక మార్గాలు, సైక్లింగ్ ట్రాక్‌లు ఏర్పాటు చేస్తారు. కుటుంబాలు సేదతీరేందుకు నీడనిచ్చే విశ్రాంతి ప్రాంతాలు, పచ్చదనంతో కూడిన ప్రదేశాలు, పిల్లల ఆట స్థలాలను నిర్మించనున్నారు.

అలాగే క్రీడా కోర్టులు, బహిరంగ వినోద ప్రాంతాలు కూడా ఈ ప్రాజెక్టులో భాగంగా ఉంటాయి. సముద్ర తీరానికి వచ్చే సందర్శకుల అవసరాలను దృష్టిలో ఉంచుకుని ఫుడ్ అండ్ డ్రింక్ కియోస్క్‌లు, కేఫ్‌లు, దుకాణాలు ఏర్పాటు చేయనున్నారు. వీటితో పాటు టాయిలెట్లు, దుస్తులు మార్చుకునే గదులు, తాగునీటి సదుపాయాలు కల్పిస్తారు.

వికలాంగులకు కూడా సులభంగా ఉపయోగపడేలా ప్రత్యేక సౌకర్యాలను ఏర్పాటు చేయనున్నారు. సముద్ర తీరంలో లైఫ్‌గార్డ్ టవర్‌తో పాటు భద్రత, రక్షణకు సంబంధించిన కేంద్రాలను నిర్మిస్తారు. సిబ్బంది, నిర్వహణ సేవల కోసం ప్రత్యేక భవనాలు కూడా ఏర్పాటు చేస్తారు.

పార్కింగ్, రహదారి సౌకర్యాల అభివృద్ధి

విజిటర్స్ వాహనాల కోసం పార్కింగ్ స్థలాలను ఏర్పాటు చేయనున్నారు. వాహనాలు సులభంగా రాకపోకలు సాగించేలా ప్రవేశ, నిష్క్రమణ మార్గాలను రూపొందిస్తారు. రాత్రివేళల్లో వెలుతురు కోసం లైటింగ్ వ్యవస్థ, వర్షపు నీరు నిల్వ ఉండకుండా డ్రైనేజీ సదుపాయాలు, చెత్త బుట్టల కోసం ప్రత్యేక ప్రాంతాలను కూడా ఏర్పాటు చేయనున్నారు. 

ఈ అభివృద్ధి ప్రాజెక్టు స్థానిక నివాసితులతో పాటు పర్యాటకులకు కూడా మెరుగైన వినోద, విశ్రాంతి సౌకర్యాలను అందిస్తుందని జైనబ్ అల్ దురాజీ తెలిపారు. అవసరమైన నిధుల ఆమోదం, ఇతర ప్రక్రియలు పూర్తయ్యే వరకు తాను ప్రాజెక్టును పర్యవేక్షిస్తానని, పనులు ప్రారంభమయ్యేలా చర్యలను కొనసాగిస్తానని ఆమె పేర్కొన్నారు.