కువైట్‌: కార్మికులకు చెల్లించిన జీతాలను తిరిగి యజమానులు వెనక్కి తీసుకునే అక్రమ విధానాలకు అడ్డుకట్ట వేసేందుకు కువైట్‌ ప్రభుత్వం కొత్త ఎలక్ట్రానిక్‌ పర్యవేక్షణ వ్యవస్థను ప్రవేశపెట్టేందుకు సిద్ధమవుతోంది. కార్మికుల ఖాతాల్లో జీతాలు జమ చేసిన తర్వాత, ఆ మొత్తాన్ని పూర్తిగా లేదా పాక్షికంగా వెనక్కి తీసుకుని తమకు తిరిగి ఇవ్వాలని కంపెనీలు ఒత్తిడి చేసే ఘటనలను గుర్తించడం ఈ వ్యవస్థ ప్రధాన లక్ష్యమని పేర్కొన్నారు. కువైట్‌ పబ్లిక్ అథారిటీ ఫర్ మ్యాన్‌పవర్‌ (PAM), సెంట్రల్ బ్యాంక్ ఆఫ్ కువైట్‌ సహకారంతో ఈ వ్యవస్థను రూపొందిస్తోంది. 

అనుమానాస్పద లావాదేవీలపై నిఘా

కొన్ని కంపెనీలు ముందుగా కార్మికుల బ్యాంకు ఖాతాల్లో జీతాలు జమ చేసి, ఆ తర్వాత ఆ డబ్బును డ్రా చేసి తిరిగి తమకు ఇవ్వాలని కోరుతున్నట్లు సమాచారం. ఇలాంటి లావాదేవీలను కొత్త వ్యవస్థ ద్వారా గుర్తించనున్నారు. జీతాలు జమ అయిన వెంటనే జరిగే అనుమానాస్పద నగదు ఉపసంహరణలను ఎలక్ట్రానిక్‌ విధానంలో పర్యవేక్షిస్తారు. వ్యవస్థ ద్వారా ఉల్లంఘనలు గుర్తించినా, కార్మికుల నుంచి ఫిర్యాదులు అందినా సంబంధిత అధికారులు వెంటనే స్పందించి, అవసరమైన చట్టపరమైన చర్యల కోసం కేసులను సంబంధిత విభాగాలకు పంపిస్తారు.

జీతాల తనిఖీకి 8 దశలు

జీతాల చెల్లింపులను ధ్రువీకరించే ఎలక్ట్రానిక్‌ ప్రక్రియలో మొత్తం 8 దశలు ఉన్నట్లు PAM తాజా నివేదికలో పేర్కొంది.
* యజమాని జీతాల చెల్లింపు అభ్యర్థనను సమర్పించడం.
* జీతాలకు సంబంధించిన వివరాలను స్వీకరించడం.
* సమర్పించిన సమాచారాన్ని పరిశీలించడం.
* కార్మికుల నమోదిత వివరాలతో జీతాల సమాచారాన్ని సరిపోల్చడం.
* వివరాలను ధ్రువీకరించడం.
* చెల్లింపులకు ఆమోదం తెలపడం.
* జీతాల చెల్లింపును అమలు చేయడం.
* తుది ఫలితాలను ఎలక్ట్రానిక్‌ విధానంలో PAMకు పంపించడం.
ఈ విధానం ద్వారా కార్మికులకు నిజంగా జీతాలు అందుతున్నాయా లేదా అనే విషయాన్ని మరింత సమర్థంగా పరిశీలించే అవకాశం ఉంటుందని తెలిపారు.

జీతాల చెల్లింపులను పర్యవేక్షించే వ్యవస్థను మరింత పటిష్ఠం చేసేందుకు ఈ చర్యలు ఉపయోగపడనున్నాయి. కొత్త ఎలక్ట్రానిక్‌ పర్యవేక్షణ విధానం అమల్లోకి వస్తే, కార్మికుల జీతాల హక్కులను కాపాడటంతో పాటు, వేతన చెల్లింపుల్లో అక్రమాలను గుర్తించేందుకు అధికారులకు మరింత అవకాశం లభించనుందని PAM అధికారులు తెలిపారు.