దోహా: ఫిఫా అండర్‌-17 ప్రపంచకప్‌ ఖతార్‌ 2026 టోర్నమెంట్‌ టికెట్ల విక్రయాలు ప్రారంభమయ్యాయి. ఈ ప్రతిష్ఠాత్మక యువ ఫుట్‌బాల్‌ టోర్నీని వీక్షించాలనుకునే అభిమానులు అధికారిక వెబ్‌సైట్‌ www.roadtoqatar.qa ద్వారా టికెట్లు కొనుగోలు చేయవచ్చు. నవంబర్ 19 నుంచి డిసెంబర్ 13 వరకు ఈ పోటీలు జరగనున్నాయి. ఖతార్‌లోని ఆస్పైర్‌ జోన్‌లో అత్యాధునిక కాంపిటీషన్‌ కాంప్లెక్స్‌ వేదికగా 48 జట్లు 104 మ్యాచ్‌ల్లో తలపడనున్నాయి. ఫైనల్‌ మ్యాచ్‌ అహ్మద్‌ బిన్‌ అలీ స్టేడియంలో నిర్వహించనున్నారు.

 రూ.450 నుంచి టికెట్లు

గ్రూప్‌ దశ నుంచి క్వార్టర్‌ ఫైనల్స్‌ వరకు మ్యాచ్‌లను వీక్షించేందుకు అభిమానులకు డే పాస్‌ టికెట్లు అందుబాటులో ఉన్నాయి. వీటి ధర ఒక్కో మ్యాచ్‌ రోజుకు QAR 20. ఒకే రోజులో ఆస్పైర్‌ జోన్‌లో గరిష్ఠంగా ఎనిమిది మ్యాచ్‌లను వీక్షించే అవకాశం ఉంటుంది. అలాగే ఫ్యాన్‌ జోన్‌లో సాంస్కృతిక, వినోద కార్యక్రమాలను ఆస్వాదించవచ్చు. ఒక్కో వ్యక్తి ఒక మ్యాచ్‌ రోజుకు గరిష్ఠంగా ఆరు డే పాస్‌ టికెట్లు కొనుగోలు చేయవచ్చు. అన్ని టికెట్లు డిజిటల్‌ రూపంలోనే అందుబాటులో ఉంటాయి.

నవంబర్ 19న ఖతార్‌ తొలి మ్యాచ్‌

ఆతిథ్య ఖతార్‌ జట్టు గ్రూప్‌-Aలో ఈజిప్ట్‌, గ్రీస్‌, పనామా జట్లతో ఉంది. నవంబర్ 19న సాయంత్రం 6:30 గంటలకు పనామాతో ఖతార్‌ తన తొలి మ్యాచ్‌ ఆడనుంది. డిసెంబర్ 13న రాత్రి 7 గంటలకు అహ్మద్‌ బిన్‌ అలీ స్టేడియంలో ఫైనల్‌ మ్యాచ్‌ జరగనుంది. ఫైనల్‌ మ్యాచ్‌కు ఒక్కో వ్యక్తి గరిష్ఠంగా ఆరు టికెట్లు కొనుగోలు చేయవచ్చు.

దివ్యాంగులకు ప్రత్యేక సదుపాయాలు

దివ్యాంగ అభిమానుల కోసం అందుబాటులో ఉండే సీటింగ్‌ సదుపాయాలను కూడా నిర్వాహకులు కల్పిస్తున్నారు. గ్రూప్‌ దశ నుంచి మూడో స్థానం కోసం జరిగే మ్యాచ్‌ వరకు టికెట్‌ ధర QAR 20 కాగా, ఫైనల్‌కు QAR 15గా నిర్ణయించారు. ఈ టికెట్లతో పాటు ఒక సహాయకుడికి ఉచిత టికెట్‌ అందిస్తారు. అందుబాటులో ఉండే సీట్లను బుక్‌ చేసుకోవడంతో పాటు ప్రత్యేక పార్కింగ్‌ సదుపాయాల కోసం [email protected] కు ఈ-మెయిల్‌ పంపవచ్చు.

వరుసగా ఐదేళ్లు ఖతార్‌లో టోర్నీ

2029 వరకు వరుసగా ఐదు ఎడిషన్లకు ఆతిథ్యమివ్వనున్న ఖతార్‌కు, 2026 టోర్నీ రెండో ఎడిషన్‌ కానుంది. గత ఏడాది జరిగిన 2025 టోర్నీలో 197,000 మందికి పైగా అభిమానులు పాల్గొన్నారు. ఆస్పైర్‌ జోన్‌లో ఒకే రోజులో పలు మ్యాచ్‌లను వీక్షిస్తూ వినోద కార్యక్రమాలను ఆస్వాదించే అవకాశం వారికి లభించింది.