మస్కట్‌: దేశ అభివృద్ధిలో యువత కీలక పాత్ర పోషిస్తున్నారని, వారే జాతీయ ప్రగతికి పునాది అని ఒమన్‌ సాంస్కృతిక, క్రీడలు, యువజన వ్యవహారాల మంత్రి సయ్యద్‌ సౌద్‌ హిలాల్‌ అల్‌ బుసైదీ పేర్కొన్నారు. యువత సామర్థ్యాలను వినియోగించుకోవడం ద్వారా దేశ భవిష్యత్తును మరింత బలోపేతం చేయవచ్చని ఆయన తెలిపారు. ప్రతి సంవత్సరం అక్టోబర్‌ 26న నిర్వహించే ఒమానీ యువజన దినోత్సవం సందర్భంగా మంత్రి ఈ వ్యాఖ్యలు చేశారు. ఈ ఏడాది వేడుకలను ‘దృఢ సంకల్పం’ (అల్‌ అజ్మ్‌) అనే నినాదంతో నిర్వహిస్తున్నారు. సవాళ్లను అవకాశాలుగా, ఆశయాలను విజయాలుగా మార్చగల సామర్థ్యం ఒమన్‌ యువతకు ఉందని ఈ నినాదం తెలియజేస్తుందని మంత్రి వివరించారు.

యువతకు ప్రభుత్వ, ప్రైవేటు రంగాల సహకారం

యువతలోని సంకల్పం వ్యక్తిగత స్థాయికే పరిమితం కాకుండా, దేశం మొత్తం అనుసరించాల్సిన విధానంగా మారాలని మంత్రి అన్నారు. యువతలోని ప్రతిభను వెలికితీసేందుకు అనుకూల వాతావరణాన్ని కల్పిస్తున్న ప్రభుత్వ సంస్థలు, ప్రైవేటు రంగం పాత్రను ఆయన ప్రశంసించారు. ఈ నేపథ్యంలో మస్కట్‌లో యూత్‌ సెంటర్‌ ఏర్పాటుకు OQ గ్రూప్‌ అందిస్తున్న RO 20 మిలియన్ల మద్దతు జాతీయ భాగస్వామ్యానికి మంచి ఉదాహరణగా నిలుస్తుందని తెలిపారు. ఈ కేంద్రం ద్వారా యువత తమ నైపుణ్యాలను మెరుగుపరచుకోవడంతో పాటు, ప్రతిభను అభివృద్ధి చేసుకోవడానికి, కొత్త ఆలోచనలకు పదును పెట్టడానికి, వాటిని విలువను సృష్టించే ప్రాజెక్టులుగా మార్చుకోవడానికి అవకాశం లభిస్తుందని పేర్కొన్నారు.

నిర్ణయాల్లోనూ యువతకు భాగస్వామ్యం

యువతకు అవకాశాలు కల్పించడమే సాధికారత కాదని మంత్రి స్పష్టం చేశారు. వారి వర్తమానం, భవిష్యత్తుపై ప్రభావం చూపే నిర్ణయాల్లో కూడా యువత చురుగ్గా పాల్గొనేలా చూడాలని అన్నారు. యువజన కార్యక్రమాలను మరింత మెరుగుపరచడం, వివిధ రంగాల మధ్య సమన్వయాన్ని పెంచడం, యువత అవసరాలు, ఆశయాలకు అనుగుణంగా భాగస్వామ్యాలను బలోపేతం చేయడంపై మంత్రిత్వ శాఖ దృష్టి సారిస్తోందని వివరించారు.

యువతపై పెట్టుబడి.. దేశ భవిష్యత్తుపై పెట్టుబడే

ఒమన్‌ యువత దేశ నిర్మాణం, అభివృద్ధి ప్రయాణాన్ని ముందుకు తీసుకెళ్లగలరనే నమ్మకం తమకు ఉందని మంత్రి పేర్కొన్నారు. యువత శక్తిసామర్థ్యాలపై పెట్టుబడి పెట్టడం అంటే ఒమన్‌ భవిష్యత్తుపై పెట్టుబడి పెట్టడమేనని చెప్పారు. యువతలోని దృఢ సంకల్పం, పట్టుదలకు ప్రభుత్వ సంస్థల మద్దతు, జాతీయ స్థాయిలో సమర్థవంతమైన భాగస్వామ్యాలు తోడైతే దేశం మరింత అభివృద్ధి, సౌభాగ్యం దిశగా ముందుకు సాగుతుందని ఆయన ఆశాభావం వ్యక్తం చేశారు.