దోహా: ఖతార్‌లోని జెరియన్ నజీమా ప్రాంతంలో నీటి సరఫరాను తాత్కాలికంగా నిలిపివేయనున్నట్లు ఖతార్ జనరల్ ఎలక్ట్రిసిటీ అండ్ వాటర్ కార్పొరేషన్ (కహ్రామా) ప్రకటించింది. ఈ మేరకు సోషల్ మీడియా వేదికగా వెల్లడించిన కహ్రామా.. నవంబర్ 1నుంచి నీటి సరఫరాలో అంతరాయం ఏర్పడుతుందని తెలిపింది. తదుపరి ప్రకటన వెలువడే వరకు ఈ అంతరాయం కొనసాగుతుందని పేర్కొంది.

వతన్ విన్యాసాల్లో భాగంగా..

వతన్ ఎక్సర్‌సైజ్‌లో భాగంగా ఈ తాత్కాలిక అంతరాయం ఏర్పడనుంది. అత్యవసర పరిస్థితులను ఎదుర్కొనేందుకు వ్యవస్థల సన్నద్ధతను పరీక్షించడం, వినియోగదారుల్లో ముందస్తు అవగాహన పెంచడం, అత్యవసర సమయాల్లో స్పందన సామర్థ్యాన్ని మెరుగుపరచడం ఈ విన్యాసాల ప్రధాన ఉద్దేశమని కహ్రామా వివరించింది. విద్యుత్, నీటి సేవల విశ్వసనీయతను మరింత బలోపేతం చేయడంతో పాటు నిరంతర సేవల అందుబాటును నిర్ధారించేందుకు ఈ చర్యలు చేపడుతున్నట్లు తెలిపింది.