రియాద్: సౌదీ అరేబియాలోని భూ, సముద్ర, వాయు సరిహద్దు కేంద్రాల వద్ద కస్టమ్స్ అధికారులు భారీ స్థాయిలో అక్రమ సరుకులను పట్టుకున్నారు. వివిధ రకాల నిషేధిత వస్తువులకు సంబంధించి మొత్తం 1,147 కేసులను గుర్తించి స్వాధీనం చేసుకున్నట్లు సౌదీ జకాత్, ట్యాక్స్ అండ్ కస్టమ్స్ అథారిటీ (ZATCA) వెల్లడించింది. దేశ భద్రతను బలోపేతం చేయడం, అక్రమ వస్తువుల నుంచి ప్రజలను రక్షించడమే లక్ష్యంగా కొనసాగుతున్న తనిఖీల్లో ఈ పట్టివేతలు జరిగినట్లు అధికారులు తెలిపారు.పట్టుబడిన అక్రమ వస్తువుల్లో హషీష్, కొకైన్, హెరాయిన్, మెథాంఫెటమైన్, క్యాప్టగాన్ మాత్రలు సహా 48 రకాల మాదకద్రవ్యాలు ఉన్నట్లు వెల్లడించారు. వీటితో పాటు 270 రకాల నిషేధిత పదార్థాలను కూడా అధికారులు స్వాధీనం చేసుకున్నారు.

పొగాకు అక్రమ రవాణాపై 839 కేసులు

పొగాకు, దాని ఉత్పత్తులకు సంబంధించిన 839 అక్రమ రవాణా ప్రయత్నాలను కస్టమ్స్ అధికారులు అడ్డుకున్నారు. అలాగే నగదుకు సంబంధించిన తొమ్మిది అక్రమ రవాణా కేసులను గుర్తించారు. దేశంలోకి దిగుమతి అయ్యే, విదేశాలకు ఎగుమతి చేసే వస్తువులపై తనిఖీలను మరింత కఠినతరం చేస్తామని ZATCA స్పష్టం చేసింది. ఈ చర్యల్లో సంబంధిత భద్రతా విభాగాలతో సమన్వయం చేసుకుంటూ ముందుకు సాగుతున్నట్లు తెలిపింది.అక్రమ రవాణాను అరికట్టడంలో ప్రజలు కూడా భాగస్వాములు కావాలని అధికారులు కోరారు.

అనుమానాస్పద కార్యకలాపాలు, కస్టమ్స్ నిబంధనల ఉల్లంఘనలపై సమాచారం ఉంటే 1910 హాట్‌లైన్‌కు లేదా అంతర్జాతీయ నంబర్ +966 1910కు ఫోన్ చేయవచ్చని సూచించారు. అలాగే ఈ-మెయిల్ ద్వారా కూడా ఫిర్యాదు చేయవచ్చని తెలిపారు. సమాచారం ఇచ్చిన వారి వివరాలను పూర్తిగా గోప్యంగా ఉంచుతామని ZATCA హామీ ఇచ్చింది. ధ్రువీకరించిన సమాచారం ఆధారంగా అక్రమ రవాణా కేసులు వెలుగులోకి వస్తే సమాచారమిచ్చిన వారికి నగదు బహుమతులు కూడా అందజేస్తామని వెల్లడించింది. అక్రమ రవాణాను అరికట్టడం ద్వారా ప్రజల భద్రతతో పాటు దేశ ఆర్థిక వ్యవస్థను కాపాడవచ్చని అధికారులు పేర్కొన్నారు.