లండన్: అంతర్జాతీయ పర్యాటక రంగంలో తమ స్థానాన్ని మరింత బలోపేతం చేసుకునే లక్ష్యంతో ఒమన్ ప్రభుత్వం లండన్‌లో జరుగుతున్న వరల్డ్ ట్రావెల్ మార్కెట్ (WTM) ప్రదర్శనలో పాల్గొంటోంది. నవంబర్ 5 వరకు జరిగే ఈ కార్యక్రమంలో ఒమన్ వారసత్వ, పర్యాటక మంత్రిత్వ శాఖ ఆధ్వర్యంలో ప్రత్యేక పెవిలియన్‌ను ఏర్పాటు చేసింది.

ఈ పెవిలియన్‌లో ఒమన్ పర్యాటక రంగానికి చెందిన 29 సంస్థలు పాల్గొంటున్నాయి. దేశంలోని ప్రత్యేక పర్యాటక ఆకర్షణలను ప్రపంచానికి పరిచయం చేయడం, వాణిజ్య భాగస్వామ్యాలను విస్తరించడం, అంతర్జాతీయ ట్రావెల్ కంపెనీలు, టూర్ ఆపరేటర్లు, విమానయాన సంస్థలతో కొత్త ఒప్పందాలకు మార్గం సుగమం చేయడం ఈ ప్రదర్శన ప్రధాన ఉద్దేశం.

ఒమన్‌లోని చారిత్రక వారసత్వం, సాంస్కృతిక ప్రత్యేకతలు, ప్రకృతి అందాలు, సాహస పర్యాటకం, సంప్రదాయ ఆతిథ్య సేవలను అంతర్జాతీయ సందర్శకులకు పరిచయం చేస్తున్నారు. పర్యాటక రంగంలో పెట్టుబడులకు ఉన్న అవకాశాలను కూడా వివరిస్తున్నారు.

ఈ సందర్భంగా ఒమన్ వారసత్వ, పర్యాటక శాఖ మంత్రి సయ్యద్ ఇబ్రహీం సయీద్ అల్ బుసైదీ మాట్లాడుతూ.. అంతర్జాతీయ ప్రయాణ రంగంలో ఒమన్ ఉనికిని విస్తరించేందుకు ఈ ప్రదర్శన దోహదపడుతుందని తెలిపారు. దేశ ప్రత్యేకతలు, సాంస్కృతిక సంపద, ప్రకృతి అందాలతో పాటు పర్యాటకులకు ఆతిథ్యం అందించడంలో ఒమన్ ప్రజల పాత్ర ఎంతో కీలకమని పేర్కొన్నారు.

ప్రపంచ దేశాలు ఒమన్‌ను సందర్శించాలని ఆహ్వానిస్తున్నామని, సురక్షితమైన, ఆహ్లాదకరమైన పర్యాటక గమ్యస్థానంగా దేశం గుర్తింపు పొందిందని ఆయన చెప్పారు. పర్వతాలు, వాడీలు, ఎడారులు, సముద్ర తీరాలతో పాటు చారిత్రక గ్రామాలు, కోటలు, సంప్రదాయ మార్కెట్లను ఒకే పర్యటనలో ఆస్వాదించే అవకాశం ఉందన్నారు.

కుటుంబ పర్యాటకం, విలాసవంతమైన హోటళ్లు, పర్వత ప్రాంతాల్లో ట్రెక్కింగ్, సాహస యాత్రలు, ప్రశాంతమైన విహారాలను కోరుకునే అన్ని వర్గాల పర్యాటకుల అవసరాలకు అనుగుణంగా ఏర్పాట్లు చేస్తున్నట్లు వివరించారు. ప్రకృతి, సంస్కృతి, స్థానిక జీవన విధానం కలగలిసిన అనుభవమే ఒమన్ పర్యాటక రంగానికి ప్రత్యేక ఆకర్షణ అని తెలిపారు.

పర్యావరణం, చారిత్రక వారసత్వ సంపదను కాపాడుతూ స్థిరమైన పర్యాటక అభివృద్ధికి ప్రాధాన్యం ఇస్తున్నట్లు మంత్రి తెలిపారు. చిన్న, మధ్యతరహా పరిశ్రమలు (SMEs), స్థానిక సమాజాలకు మద్దతు ఇవ్వడం ద్వారా ఉపాధి అవకాశాలను పెంచడంతో పాటు 'ఒమన్ విజన్ 2040' లక్ష్యాలకు అనుగుణంగా జాతీయ ఆర్థిక వ్యవస్థలో పర్యాటక రంగం వాటాను పెంచాలని లక్ష్యంగా పెట్టుకున్నట్లు చెప్పారు.