దెబ్బమీద దెబ్బ దెబ్బలన్నీ నాకే 
ఇవి నాకేం క్రొత్త కాదు 

అధికారులు,పాలకుల లంచాలు వనరుల 
దోపిడీ,రాజకీయ ఓటు దోపిడీ 
వ్యాపారుల కల్తీమందులు నిత్యావసరాల దోపిడీ,
పైనున్న వాడి నీటి దోపిడీ మధ్య దళారుల చెమట దోపిడీ 
ఇంకా చెప్పాలంటే ప్రభుత్వ కార్యాలయాల ముందు 
నిరీక్షించే,వ్యర్ధ పదార్థంగా నాకు చెందే హక్కుల దోపిడీ 
ఇంకా ఇలాంటివి ఎన్నో ఎన్నెన్నో ... 

అయినా నాకేం కాలే,దేనికి జన్కలే.. 

ఎందుకంటే నేను ప్రకృతిని జూసుకొని 
మురిసిన వాన్ని,నేను కాలంతో పాటు 
నడిసిన వాన్ని,

తిండి గింజల్ని సృష్టించడంలో బిజీ అయిన వాన్ని 

కానీ కర్మ కాలి కాలం నాతో కలిసి రావటంలే, 

ఇప్పుడిక్కడ 
భూమి గొంతు తడారి పోతుంది 
చిగురించాల్సిన నా చిన్నారి తోటను 
మాడ్చుతూ,చుక్క నీరులేకుండా 

ఇక ఇప్పుడు పొల మారిన కాలం
కాళయముడై కురుస్తున్నాడు 
వడగళ్ళ వానై,నా యెదపై కాదు కాదు 
నా నోటికాడి బువ్వఫై 

అయినా నన్ను రాజంటారు మనసున్న 
కవులు,రచయితలందరూ.. 
రైతే రాజు అంటారు ఇంకా ఎందరో మరెందరో.. 
ఎందుకో..మరి ఏ అవసరానికో,ఎందుకో మరి 
నాకీ సానుభూతి మరెందుకో.. 

భూమిని నమ్మి కష్టాల కడలిలో ఈదుతున్న
నేనిప్పుడు రాజునేనా మరి మీరైనా చెప్పండి?

(12-06-2013. అతివృష్టి అనావృష్టితో గుండె చితికి పోతున్న రైతన్నలు.. )

--జయ రెడ్డి బోడ(అబుధాబి)