ఆకలిని నియంత్రించుకోవడానికి కొన్ని రకాల డ్రైఫ్రూట్స్‌, నట్స్‌ ఉపయోగపడతాయన్న విషయం తెలిసిందే. అయితే వాటిలో మొదటి స్థానం పిస్తా పప్పులకుంది. బాగా ఆకలిగా ఉన్నప్పుడు కొన్ని పిస్తా పప్పులు తింటే ఆకలి తీరినట్లుగా అనిపించి, శరీరానికి తక్షణ శక్తి లభిస్తుంది. అంతేకాదు పిస్తా ఆరోగ్యానికి చాలా రకాలుగా ఉపయోగపడుతుంది. పిస్తాలో ఉండే విటమిన్‌ 'ఇ' చర్మం మృదువుగా అవ్వడానికి తోడ్పడుతుంది. జీర్ణవ్యవస్థ సక్రమంగా పని చేసేలా చేస్తుంది. వీటిలోని పోషకాలు కంటి చూపు స్పష్టంగా ఉండడానికి దోహదం చేస్తాయి. అంతేకాకుండా శరీరంలోని అన్ని కణాలకు రక్తం సరఫరా బాగా జరిగేలా చేస్తుంది. వీటిలో ఉండే విటమిన్‌ బి6 మెదడు చురుగ్గా పని చేసేలా చేస్తుంది. పిస్తా పప్పులు రోజూ తీసుకోవడం వల్ల శరీరంలోని చెడు కొలెస్ట్రాల్‌ నిల్వలు తరిగిపోతాయి. పిస్తా గుండెకు చాలా మంచిది. ప్రతి రోజూ పిస్తా తినే అలవాటుండేవారికి గుండె పోటు వచ్చే అవకాశాలు చాలా తక్కువ. నరాల్లో రక్తం గడ్డకట్టుకుండా చేస్తుంది. పిస్తా శరీరంలో ఇన్సులిన్‌ శాతాన్ని పెంచేందుకు తోడ్పడుతుంది. అందుకే మధుమేహం ఉన్నవారు కూడా పిస్తా తింటే చాలా మంచిది.