అలనాటి నటుడు మిథున్‌ చక్రబర్తి కొంతకాలంగా అనారోగ్యంతో బాధపడుతున్నాడు. రెండు వారాల క్రితం మిథున్‌ లాస్‌ఏంజెల్స్‌కి వెళ్లాడు. ప్రస్తుతం దాదా(మిథున్‌) ముంబయిలో లేడని ఆయన లాస్‌ఏంజెల్స్‌లో విశ్రాంతి తీసుకుంటున్నాడని కనీసం ఫోను కూడా వాడటం లేదని ఆయన మేనేజర్‌ విజయ్‌ మీడియాకు వెల్లడించారు. మిథున్‌ నెల తర్వాతే ముంబయి వస్తారని పేర్కొన్నాడు. మిథున్‌ 2009లో లక్ చిత్రంలో నటిస్తున్నప్పుడు హెలికాప్టర్‌ నుంచి కిందకి దూకాల్సిన సన్నివేశం చేయాల్సి వచ్చింది. అప్పుడు ఆయన ప్రమాదవశాత్తు కిందపడ్డాడు. దాంతో ఆయన కాలికి తీవ్ర గాయం అయింది. అప్పటికి గాయం పూర్తిగా మానిపోయినా నెలరోజుల క్రితం మళ్లీ నొప్పి మొదలైందని మేనేజర్‌ విజయ్ చెప్పాడు.