రామనాథపురం జిల్లా రామేశ్వరంలో ప్రసిద్ధిచెందిన రామనాథ ఆలయంపై డ్రోన్ సహాయంతో వీడియో తీసిన రష్యాకు చెందిన హరే కృష్ణ హరే రామ సభ్యుడిని పోలీసులు మంగళవారం నిర్బంధించారు. పురాతన రామనాథస్వామి ఆలయానికి సంవత్సరమంతా స్వదేశీ, విదేశీ భక్తులు పెద్ద సంఖ్యలో తరలివస్తుంటారు. హరే రామ హరే కృష్ణ సంస్థకు చెందిన 81 మంది రష్యా నుంచి ఆధ్యాత్మిక పర్యటన పేరుతో మంగళవారం ఉదయం రామేశ్వరానికి వచ్చారు. వారు రామేశ్వరం ఆలయ రథ వీధిలో భక్తిగీతాలు ఆలపిస్తూ ఊరేగింపుగా వెళ్లారు. ఆ సమయంలో ఉన్నట్టుండి ఆకాశంలో ఓ డ్రోన్ శబ్దం చేసుకుంటూ ఎగురుతుండటాన్ని ఆలయ సిబ్బంది గమనించారు. ఆ డ్రోన్‌కు అమర్చిన కెమెరాతో రామనాథస్వామి ఆలయం, పరిసర ప్రాంతాలను వీడియో తీస్తుండగా అడ్డుకొని స్థానిక పోలీసులకు ఫిర్యాదుచేశారువెంటనే అక్కడకు చేరుకున్న పోలీసులు ఆలయ అధికారుల అనుమతి లేకుండా ఎగురవేసిన డ్రోన్‌ను స్వాధీనం చేసుకున్నారు. దీనికి సంబంధించి నూత్తిజిలుసాన అనే వ్యక్తిపై కేసు నమోదుచేసి దర్యాప్తు చేపట్టారు.