హరి దర్శకత్వంలో సూర్య, అనుష్క, శ్రుతిహాసన్‌ తదితరులు నటించిన చిత్రం 'ఎస్‌ 3'. ఈ చిత్రం షూటింగ్‌ పూర్తయింది. ఈ ఏడాది ప్రారంభంలో ఆరంభమైన ఈ చిత్ర షూటింగ్‌ సుమారు పది నెలలు జరిగి పూర్తి చేసుకుంది. చెన్నై, విశాఖపట్నం, హైదరాబాద్‌ తదితర ప్రాంతాలలో షూటింగ్‌ జరిగింది. హరి దర్శకత్వంలో సూర్య నటించిన 'సింగం' చిత్రం మొదటి భాగం 2010లో సూపర్‌ హిట్‌ కొట్టింది. దీంతో ఈ చిత్రానికి రెండో భాగంగా 2013లో 'సింగం - 2'ను విడుదల చేశారు. ఈ రెండు భాగాలు వ్యాపారపరంగా భారీ వసూళ్లను రాబట్టాయి. దీంతో మూడో భాగాన్ని విడుదల చేయడానికి హరి నిర్ణయించారు.

దీనికి 'సింగం' కాకుండా 'ఎస్‌ 3'గా పేరు పెట్టారు. ఈ చిత్రాన్ని ఒకేసారి తమిళం, తెలుగు భాషల్లో విడుదల చేయనున్నారు. ఇటీవల సూర్య నటించిన చిత్రాలు పెద్దగా హిట్‌టాక్‌ తెచ్చుకోకపోవడంతో ఆయన 'ఎస్‌ 3' పైనే ఆశలు పెట్టుకున్నారు. అందుకు అనుగుణంగానే ఈ చిత్ర షూటింగ్‌ దశలోనే వ్యాపారం ముగిసినట్లు సమాచారం.

తొలి రెండు భాగాల్లోనూ నటించిన అనుష్క, మూడో భాగంలో కూడా సూర్యతో జోడీ కడుతున్నారు. చిత్రంలో మరో హీరోయిన్‌గా శ్రుతిహాసన్‌ నటించారు. హారిస్‌ జయరాజ్‌ సంగీతాన్ని సమకూర్చిన ఈ చిత్రం టీజర్‌ దీపావళికి విడుదల చేస్తారని భావిస్తున్నారు. డిసెంబర్‌ 16న 'ఎస్‌ 3' విడుదల కానుంది.