దక్షిణాది సూపర్‌స్టార్‌ రజనీకాంత్‌కు స్వదేశంలోనే కాదు విదేశాల్లో కూడా బోలెడంత మంది ఫ్యాన్స్‌ ఉన్నారు. రీల్‌ లైఫ్‌లో ఎంత స్టైలిష్‌గా కనబడతారో, రియల్‌ లైఫ్‌లో అంత నిరాడంబరంగా ఉంటారు. తోటి నటులతో ఎంతో స్నేహంగా ఉంటారు. తమిళ సీనియర్‌ నటుడు శివకుమార్‌ (సూర్య, కార్తీల తండ్రి) 75వ జన్మదినోత్సవాన్ని పురస్కరించుకుని ఆయనకు రాసిన లేఖలో రజనీ కొన్ని ఆసక్తికర విషయాలు వెల్లడించారు. అంతపెద్ద సూపర్‌స్టార్‌ అయ్యుండీ తనలోని చెడు అలవాట్ల గురించి ప్రపంచానికి ఆ లేఖ ద్వారా తెలియజేశారు. 'ఆయన దగ్గర్నుంచి కెరీర్‌ తొలినాళ్లలో ఎన్నో విలువైన పాఠాలు నేర్చుకున్నాను. అప్పట్లో నేను ఆల్కహాల్‌, సిగరెట్లు మోతాదుకు మించి తీసుకుంటుండేవాడిని.గొప్ప నటుడిగా ఎదగాలంటే అలాంటి అలవాట్లకు దూరంగా ఉండాలని శివకుమార్‌ నన్ను హెచ్చరించేవారు. ఆయనది మహోన్నత వ్యక్తిత్వం. చెడు అలవాట్లతో నేను ఆరోగ్యం పాడుచేసుకున్నాను. అయితే ఆయన ఇచ్చిన సలహాలు పాటించి శారీరకంగా, మానసికంగా దృఢంగా తయారయ్యా.శివకుమార్‌కు దేవుడు ఆయురారోగ్యాలు అందించాలని కోరుకుంటున్నాన'ని రజనీ ఆ లేఖలో పేర్కొన్నారు.