సుకుమార్‌ కథలు వైవిధ్యంగా సాగిపోతుంటాయి. సైన్స్‌ ఫిక్షన్‌, మైండ్‌ గేమ్‌, థ్రిల్లర్‌ అంటే ఆయనకు ఇష్టం. ఇప్పుడు రామ్‌చరణ్‌తో ఓ సినిమా చేస్తున్నారాయన. ఆ కథ కూడా సైన్స్‌ ఫిక్షన్‌ అని తెలుస్తోంది. ఈచిత్రానికి 'ఫార్ములా ఎక్స్‌' అనే పేరు పెట్టారని గతంలో ప్రచారం జరిగింది. ఇప్పుడు మరో పేరు బయటకు వచ్చింది. ఫేస్‌ బుక్‌ చాటింగ్‌ ఎట్‌ 8 పీఎమ్‌ అనే పేరు పెట్టాలన్న ఆలోచనలో ఉన్నట్టు గుసగుసలు వినిపిస్తున్నాయి. అయితే చిత్రబృందం మాత్రం ఈ విషయాన్ని ధృవీకరించడం లేదు. ''సుకుమార్‌ సినిమాల్లో లెక్కలు, ఫార్ములాలూ కనిపించొచ్చు.కానీ టైటిళ్లు మాత్రం అందరికీ నచ్చేలా, కమర్షియల్‌ సూత్రాలకు లోబడే ఉంటాయి. ఈసారీ అలాంటి టైటిల్‌నే ఎంచుకొంటారు'' అని సుకుమార్‌ సన్నిహితులు చెబు తున్నారు. ఈయేడాది చివర్లో ఈ సినిమా సెట్స్‌పైకి వెళ్లనుంది. కథానాయికగా రాశీఖన్నా పేరు ఖరారైందని సమాచారం.