'శ్రీమంతుడు' సూపర్‌హిట్‌ సినిమా కాంబినేషన్‌ మహేష్‌బాబు, కొరటాల శివ మరోసారి రిపీట్‌ అవుతోంది. డి.వి.వి. ఎంటర్‌టైన్‌మెంట్స్‌, ఎల్‌.ఎల్‌.బి. పతాకాలపై రూపొందే ఈ చిత్రం షూటింగ్‌ లాంఛనంగా ప్రారంభించారు. హైదరాబాద్‌లోని రామానాయుడు స్టూడియోలో దేవుడి పటాలపై చిత్రీకరించిన ముహూర్తపు షాట్‌కి ప్రముఖ నిర్మాత ఎం.శ్యామ్‌ప్రసాద్‌రెడ్డి క్లాప్‌ కొట్టగా, మరో సీనియర్‌ నిర్మాత డి.సురేష్‌బాబు కెమెరా స్విచాన్‌ చేశారు. ఈ చిత్రం షూటింగ్‌ ఫిబ్రవరి నుండి మొదలవుతుంది. విజయదశమికి విడుదల చేస్తారు.
ఈ సందర్భంగా దర్శకుడు కొరటాల శివ మాట్లాడుతూ "శ్రీమంతుడు వంటి సూపర్‌హిట్‌ సినిమా తర్వాత మహేష్‌బాబుతో చేస్తున్న సినిమా ఇది.

'శ్రీమంతుడు' కంటే పవర్‌ఫుల్‌ కథతో తీస్తున్నాం. ఈ చిత్రం తెలుగు సినిమా స్థాయిని పెంచేవిధంగా ఉంటుంది. ఇందులో మహేష్‌ ఇంతవరకు పోషించనటువంటి క్యారక్టర్‌లో కనిపిస్తారు. హీరోయిన్‌ ఎవరనేది త్వరలో వెల్లడిస్తాం. రవి కె.చంద్రన్‌, దేవిశ్రీప్రసాద్‌ వంటి టాప్‌ టెక్నీషియన్స్‌ పనిచేస్తున్నారు. చాలా భారీ ఎత్తున ఈ చిత్రాన్ని డి.వి.వి.దానయ్య నిర్మిస్తున్నారు" అని చెప్పారు. 
నిర్మాత మాట్లాడుతూ "మహేష్‌బాబుతో ఒక సంచలనం చిత్రం చేయాలనేది నా చిరకాల కోరిక. అది ఇప్పుడు నెరవేరుతున్నందుకు ఆనందంగా ఉంది. వరుస విజయాలు అందిస్తున్న కొరటాల శివ దర్శకత్వంలో ఈ సినిమా తీస్తున్నందుకు ఆనందంగా ఉంది. తెలుగు సినిమా స్థాయిని మరింత పెంచేవిధంగా ఈ చిత్రం ఉంటుంది" అని అన్నారు.
సంగీత దర్శకుడు దేవిశ్రీప్రసాద్‌ మాట్లాడుతూ "వరుసగా కొరటాల శివగారి సినిమాలన్నీ చేయడం ఆనందంగా ఉంది. 'శ్రీమంతుడు' ఆడియో పెద్ద హిట్‌ అయింది. ఇది దానికంటే పెద్ద కథాచిత్రం. శ్రీమంతుడి కంటే పెద్ద హిట్‌ అవుతుంది" అన్నారు.
సినిమాటోగ్రాఫర్‌ రవి.కె.చంద్రన్‌ మాట్లాడుతూ "మూడేళ్ళ క్రితం ట్విట్టర్‌లో నా అభిమాన హీరో మహేష్‌ అని ట్వీట్‌ చేశాను. ఇప్పుడు మహేష్‌తో సినిమా చేయడం సంతోషంగా ఉంది. టెక్నికల్‌గా ఈ సినిమా హై రేంజ్‌లో ఉంటుంది "అని చెప్పారు.