దాదాపు ఐదేళ్లకు పైగా విదేశాలలో స్థిరపడిన ప్రవాసులకు ఓటు హక్కును విస్తరించేందుకు ఉద్దేశించిన బిల్లును కెనడా పార్లమెంట్‌ గురువారం ఆమోదించింది. విదేశాలలో నివశిస్తున్న కెనడా పౌరులు తమ ఓటర్‌ సమాచార కార్డులను గుర్తింపు కార్డులుగా ఉపయోగించుకుని ఓటింగ్‌లో పాల్గనవచ్చని ఈ బిల్లును ప్రవేశపెట్టిన ప్రజాతంత్ర వ్యవస్థల మంత్రి మర్యం మాన్సెఫ్‌ చెప్పారు. ప్రవాసులకు ఓటు హక్కు కల్పించటం ద్వారా దేశంలో జరిగే ఎన్నికల్లో ఓటర్ల భాగస్వామ్యం పెరుగుతుందన్నారు. ఈ చట్టంలో నిబంధనలు మెరుగుపర్చేందుకు, మార్పులు చేసేందుకు అవసరమైతే ప్రతిపక్షాలతో కలిసి పనిచేసేందుకు ప్రభుత్వం సిద్ధంగా వుందని ఆమె చెప్పారు బలమైన ప్రజాస్వామ్య వ్యవస్థ నిర్మాణం కోసం అర్హులైన కెనడియన్లకు ఓటు హక్కు మరింత సులభతరం చేసే ఉద్దేశంతోనే ఈ బిల్లును రూపొందించామన్నారు. ఈ చట్టానికి ఆమోదముద్ర లభిస్తే వారికి న్యాయం జరిగినట్లవుతుందని ఆమె చెప్పారు. పార్లమెంట్‌ ఆమోదించిన ఈ బిల్లు ద్వారా విదేశాలలో స్థిరపడిన దాదాపు పదిలక్షల మందికి పైగా కెనడా పైరులకు ఓటు హక్కు లభిస్తుందని ప్రభుత్వం వివరించింది.