పాస్‌పోర్టులో పుట్టినతేదీ మార్పు ప్రక్రియ నిబంధనలను ప్రభుత్వం సులభతరం చేసింది. డిజిటల్‌ సంతకాలతో ఉన్న జనన ధ్రువీకరణ పత్రాన్ని అర్హమైన రుజువుగా స్వీకరించాలని ఆదేశాలు జారీ చేసింది. వివాహ పత్రానికి సంబంధించి కూడా ఇదే చర్య తీసుకుంది. పాత నిబంధనల ప్రకారం పాస్‌పోర్టులో పుట్టినతేదీ మార్చుకోవాలంటే.. జారీ అయిన తేదీ నుంచి ఐదేళ్లు ఆగాల్సి వచ్చేది. చాలా పత్రాలు సమర్పించాల్సి రావడంతోపాటు ప్రక్రియ సుదీర్ఘంగా ఉండేది. తాజా నిబంధనలతో ఈ ఇబ్బందులు తొలిగాయి. ఇటు పాస్‌పోర్టు జారీ ప్రక్రియను మరింత పారదర్శకంగా, సరళంగా మార్చేందుకు 1980 పాస్‌పోర్టు నిబంధనల చట్టానికి సవరణ చేసేందుకు కూడా ప్రభుత్వం యోచిస్తున్నట్లు సమాచారం.