అబుదాబీ: షేక్‌ రషీద్‌ బిన్‌ సయీద్‌ స్ట్రీట్‌లోని ఓ భవనంలో అగ్ని ప్రమాదం చోటు చేసుకోవడంతో నలుగురు గాయపడ్డారు. అబుదాబీ సివిల్‌ డిఫెన్స్‌, వెంటనే సంఘటనా స్థలానికి చేరుకుని, అగ్ని కీలల్ని నియంత్రించాయి. ఇతర ప్రాంతాలకు మంటలు విస్తరించకుండా సిబ్బంది అడ్డుకున్నారు. మధ్యాహ్నం 2.12 గంటల సమయంలో సమాచారం అందుకున్న వెంటనే సివిల్‌ డిఫెన్స్‌ టీమ్‌ సంఘటనా స్థలానికి చేరుకుందని, సహాయక చర్యల్ని ముమ్మరం చేసిందని అబుదాబీ సివిల్‌ డిఫెన్స్‌ డైరెక్టర్‌ మొహమ్మద్‌ అబ్దుల్‌ జలీల్‌ అల్‌ అన్సారీ చెప్పారు. ఈ ఘటనలో ఒకరికి తీవ్రంగా గాయాలయ్యాయి. బాధితుల్ని ఆసుపత్రికి తరలించారు. అగ్నిప్రమాదాల్ని నివారించేందుకు తగిన జాగ్రత్తలు తీసుకోవాలని ఈ సందర్భంగా అధికారులు సూచించారు.