బతుకుదెరువు కోసం దుబాయ్ వెళ్లిన ఓ భారతీయ యువకుడు అక్కడ ఓ బ్రిటిష్ మహిళను లైంగికంగా వేధించాడు. ఈ కేసులో అతడిని దోషిగా నిర్ధారించిన కోర్టు మూడు నెలల జైలు శిక్ష విధించింది. పోలీసుల కథనం ప్రకారం.. ఈ ఏడాది మే 31న 35 ఏళ్ల బ్రిటిష్ మహిళ పచారీ సరుకుల కోసం ఆర్డర్ చేసింది. 23 ఏళ్ల భారతీయ యువకుడు సరుకులు తీసుకుని ఆమె ఇంటికి వచ్చాడు. గార్డెన్‌లో కూర్చున్న ఆమె అక్కడికి రమ్మని అతడిని ఆహ్వానించింది. సరుకులు డెలివరీ చేసిన తర్వాత యువకుడు అక్కడి నుంచి వెళ్లేందుకు తాత్సారం చేశాడు. ఆ తర్వాత ఒక్కసారిగా ఆమెను పట్టుకుని ముద్దుపెట్టుకున్నాడు. అనంతరం అక్కడి నుంచి పరారయ్యాడు. దీనిపై కేసు నమోదు చేసుకున్న పోలీసులు యువకుడిని అరెస్ట్ చేసి కోర్టులో హాజరుపరిచారు.

మహిళ ఆరోపణలను నిందితుడు ఖండించాడు. సరుకులు డెలివరీ చేసేందుకు వెళ్లిన తనకు మద్యం ఆఫర్ చేసిందని, తీసుకునేందుకు తాను నిరాకరించడంతో కట్టుకథ అల్లిందని వివరించాడు. దీంతో నిజనిర్ధారణ కోసం ఫోరెన్సిక్ నిపుణులు మహిళ మెడమీది డీఎన్ఏను సేకరించి చేసిన పరీక్షలో అతడు ఆమె శరీరాన్ని ముట్టుకున్నట్టు తేలింది. దీంతో బుధవారం కోర్టు అతడికి మూడు నెలల జైలు శిక్ష విధించింది.

శిక్షాకాలం పూర్తయిన తర్వాత అతడిని దేశం నుంచి పంపించి వేయనున్నారు. కాగా కోర్టు తీర్పుపై పదిహేను రోజుల్లోపు పైకోర్టును ఆశ్రయించవచ్చని న్యాయమూర్తి పేర్కొన్నారు.